Mga Pangutana
◼ Haom ba ang pagpalakpak sa dihang ang usa ka pagpasig-uli ipahibalo?
Diha sa iyang mahigugmaong-kalulot, si Jehova nga Diyos nagtaganag usa ka Kasulatanhong paagi alang sa mahinulsolong mga nakasala sa pagbaton pag-usab sa iyang pag-uyon ug makab-ot ang kapasig-ulian diha sa Kristohanong kongregasyon. (Sal. 51:12, 17) Sa dihang kini mahitabo, kita gidasig sa pagpamatuod sa atong gugma sa maong tim-os nga mahinulsolong mga tawo.—2 Cor. 2:6-8.
Bisan pa niana, samtang kita malipay sa dihang ang usa ka paryente o kaila gipasig-uli, ang mahilomon nga dignidad angayng maglungtad sa panahon nga ipahibalo ang pagpasig-uli sa tawo diha sa kongregasyon. Ang Bantayanang Torre sa Oktubre 1, 1998, panid 17, nagpahayag sa mga butang niining paagiha: “Apan, kinahanglang atong hinumdoman nga ang kadaghanan diha sa kongregasyon wala mahibalo sa partikular nga mga kahimtang nga mitultol sa pagpalagpot o sa iyang pagpasig-uli. Dugang pa, tingali adunay pipila diha sa kongregasyon nga personal nga naapektohan o nasakit—tingali sa taastaas nga panahon—sa buhat nga daotan sa usa nga naghinulsol. Busa, tungod sa pagkatalandogon sa maong mga butang, sa dihang himoon ang pahibalo sa pagpasig-uli, masabot nga pugngan nato ang pagsultig mga pulong sa pagdawat hangtod nga kini isulti sa personal nga paagi.”
Bisan tuod kita malipay pag-ayo nga makita ang usa nga mobalik sa kamatuoran, ang pagpalakpak sa panahon sa iyang pagpasig-uli dili haom.
◼ Tungod sa atong gipayanong kahikayan sa pagpang-apod-apod sa literatura, unsang mga kausaban ang hayan atong himoon sa dihang magtanyag ug literatura sa pagsangyaw sa kadalanan?
Sa pagsangyaw sa kadalanan, haom nga duolon ang mga tawo nga anaa sa atong kamot ang mga magasin o mga publikasyon. Apan, dili nato buot nga itunol ang atong literatura nga walay pili ngadto ni bisan kinsang tawo na lang nga modawat niana. Ang atong tumong angayng mao ang pagsulay sa pagpakigsulti sa mga tawo. Nianang paagiha atong matino kon ang tawo interesado ba ug mouyon sa pagbasa sa atong mga publikasyon. Posible usab tingali nga isaysay nga ang atong buluhaton gihimo pinaagig mga boluntaryo ug dili sa kalihokan sa negosyo, kondili kini gisuportahan pinaagig boluntaryong mga donasyon sa tibuok kalibotan.
Bisan pa niana, daghan niadtong atong mahibalag sa kadalanan nagdali ug busa malisod alang kanato ang pagmatikod sa ilang interes. Sa maong mga kahimtang, mas maayo tingali nga yanong tanyagan ug usa ka tract sa pagpagana sa ilang kahinam sa pagbaton ug dugang literatura nato sa umaabot.
Kon kita mapinadayonon sa pagsangyaw sa kadalanan diha sa usa ka tinong dapit, ang mga tawo masinati kanato ug kini mahimong mag-abli sa dalan sa usa ka panaghisgot, nga mohatag kanatog igong panahon sa pagtino sa ilang interes.