Pasko—Unsa nay Nahitabo Niini?

NAPULO ka tuig kanhi niining bulana, gipasiugda diha sa hapin sa magasing U.S.News & World Report ang artikulong “Pagsusi sa Pasko.” Gisusi sa artikulo kon ang Pasko nahimo bang ‘mas putli ug wala na kaayo ginegosyo.’ Mao ba kanay nagakahitabo?

Ang artikulo nagpatin-aw sa mga hinungdan kon nganong dili kita angayng magdahom niana. Kini mitaho: “Walay rekord sa opisyal nga pagsaulog sa adlawng natawhan ni Kristo hangtod sa ikaupat nga siglo, sa dihang si Constantino . . . maoy emperador sa Roma.” Kana nagpakita nga “wala gayoy nakatino kon kanus-a natawo si Jesus.” Ang artikulo nag-ingon nga ang “mga ebanghelyo wala maghisgot sa tuig, ilabina sa eksaktong bulan o adlaw.” Matod pa sa usa ka historyador sa University of Texas, “ang kinaunahang mga Kristohanon dili interesado sa pagsaulog sa Adlawng Natawhan ni Kristo.”

Ilalom sa sub-ulohang “Butang nga Gibanabana,” gihisgotan sa artikulo “kon sa unsang paagi napili sa simbahan ang Disyembre 25.” Kini nag-ingon: “Gidawat sa kadaghanan ang panglantaw nga kini maoy tinuyong pagsagop sa Saturnalia ug sa uban pang paganong mga kasaulogan ingong ‘Kristiyanong selebrasyon.’” “Pinaagig pagpili sa ulahing bahin sa Disyembre alang sa Pasko, diin naanad na ang mga tawo nga magsaulog, naseguro sa mga lider sa relihiyon ang kaylap nga pagsaulog sa adlawng natawhan sa Manluluwas.” Sa tungatunga sa ika-19ng siglo, gipasiugda ang pagpamalit ug pagpanghatag ug mga regalo. “Tungod sa bag-ong tradisyon nga pagpanghatag ug regalo sa Pasko, ang mga negosyante daling makasapi, ug sa wala madugay ang mga negosyante ug mga tig-anunsiyo nagpasiugda sa Pasko.”

Busa dili gayod kita makadahom nga ang Pasko mahimong mas putli kondili mas mosukwahi pa kini sa matuod nga Kristiyanidad. Bisan pag ang modernong Pasko nabuhong sa “madanihong komersiyalismo,” ang matuod nga mga Kristohanon dili gayod magsaulog sa adlawng natawhan ni Jesus. Hinunoa, ang Bibliya nagpasiugda sa lukat nga gihatag ni Kristo pinaagi sa iyang kamatayon ug pagkabanhaw ngadto sa langit. (Mateo 20:28) Kana magpabilin nga labing hinungdanon hangtod sa hangtod.