Mga Paningkamot nga Magpalambo sa Maayong Moral nga mga Sukdanan

Sa hinapos sa 2001, kadtong naminaw sa nasodnong sibya sa Radio Mozambique nakabati niini nga pahibalo:

“Ang presidente sa Republika miduaw sa mga pasilidad sa sanga sa mga Saksi ni Jehova sa Maputo. Iyang gidasig kining maong relihiyosong pundok nga pangusgan pa ang ilang mga paningkamot sa pagpalambo sa maayong moral nga mga sukdanan taliwala sa mga pamilya ug sa pag-edukar sa mga hamtong pinaagi sa ilang mga programa sa pagtudlo sa mga tawo sa pagbasa ug pagsulat. Mga 10,000 ka tawo ang nakapahimulos na niining mga programaha. Sumala kang Presidente Chissano, ang mga programang sama niini angayng dayegon, tungod kay dako kinig ikatabang sa katilingban sa pagsulbad sa edukasyonal nga mga problema nga giatubang gihapon niining nasora.”

Ang pahibalo nagpadayon uban sa mosunod nga narekord nga bahin sa pakigpulong sa presidente: “Makapadasig kaayo kanato ang pagkakita sa interes sa daghang tawo nga makakat-on sa pagbasa ug pagsulat. Kini nagpakita kanato nga ang ordinaryong mga lungsoranon motabang kanato sa pagpauswag sa gidaghanon sa mga tawo nga makamaong mobasa ug mosulat. Busa, buot nakong dasigon ang mga Saksi ni Jehova nga pangusgan pa ang ilang mga programa sa pagtudlo sa mga tawo sa pagbasa ug pagsulat, diha sa bisan unsang pinulongan. Ang hinungdanon gayod mao nga ang mga tawo makamaong mobasa ug mosulat ug mas daling makakomunikar ug sa umaabot dunay mas dakong partisipasyon sa edukasyon.”

Ang mga Saksi ni Jehova sa Mozambique nagpahigayon ug mga klase sa pagtudlo sa mga tawo sa pagbasa ug pagsulat diha sa 850 ka dapit sa tibuok nasod aron ang mga tawo makabasa mismo sa Pulong sa Diyos. Dugang pa, nagdumala sila ug mga 50,000 ka libreng pagtuon sa Bibliya kada semana. Kining tanan maoy bahin sa tibuok-kalibotang edukasyonal nga programa nga karon nakaabot na ngadto sa 235 ka kayutaan. (Mateo 24:14) Ikaw usab makabenepisyo gikan niining programaha. Palihog ayaw pagduhaduha sa pagpakigkita sa mga Saksi ni Jehova sa inyong dapit.