“Nahibalo ba Kamo Kon Nganong Iuli Nako ang Inyong Salapi?”
‘HAY, nagkinahanglan gyod kog salapi!’ mao ang hunahuna ni Nana, usa ka nag-inusarang inahan sa tulo ka batang lalaki sa Kaspi sa Republika sa Georgia. Usa ka buntag niana ang iyang tinguha nga makakaplag ug salapi natuman. Nakakita siyag 300 lari duol sa estasyon sa polis. Walay tawo niadtong higayona. Dakodako ang kantidad sa salapi. Ang tinuod, si Nana wala pa makakitag tibuok nga 100 lari sulod sa lima ka tuig sukad nga ang lari nahimong nasodnong salapi. Ang mga negosyante sa maong dapit dili mokitag ingon niana ka dako bisan human motrabaho ug daghang tuig.
‘Unsay kapuslanan niining salapia kon mawad-an ako sa akong pagtuo, diyosnong kahadlok, ug espirituwalidad?’ si Nana namalandong. Naugmad niya ang maong Kristohanong mga hiyas, bisan pa sa mapintas nga paglutos ug mga pagdagmal tungod sa iyang pagtuo.
Pag-adto niya sa estasyon sa polis, nakita ni Nana ang lima ka polis nga nagkabuang pagpangitag usa ka butang. Nasabot niya nga nangita sila sa salapi, mao nga miduol siya kanila ug miingon: “Unsa may nawala?”
“Salapi,” sila mitubag.
“Pila man?”
“Tres siyentos lari!”
“Akoy nakakita sa inyong salapi,” matod ni Nana. Dayon siya nangutana: “Nahibalo ba kamo kon nganong iuli nako ang inyong salapi?” Sila wala mahibalo.
“Tungod kay ako usa sa mga Saksi ni Jehova,” siya mipadayon. “Kon dili pa ako Saksi, dili na nako iuli ang inyong salapi.”
Ang hepe sa kapolisan nga maoy nawad-an sa salapi mihatag kang Nana ug 20 lari isip pasalamat sa iyang kamatinud-anon.
Nabaniog dayon ang nahitabo sa tibuok distrito sa Kaspi. Pagkasunod adlaw, usa ka babayeng dyanitor nga gikan sa estasyon sa polis miingon kang Nana: “Gibutang kanunay [sa hepe] ang inyong literatura sa iyang opisina. Lagmit mas pabilhan pa niya kana karon.” Usa ka polis miingon pa gani: “Kon ang tanang tawo mga Saksi ni Jehova, kinsa pay mohimog krimen?”