Pagpanghatag nga Bililhon sa mga Mata ni Jehova

Ang mosunod nga sulat nadawat sa sangang buhatan sa mga Saksi ni Jehova sa Mozambique:

“Ako siyete-anyos nga batang lalaki. Nagtungha pa ako sa primarya. Ako nagapadala niining salapi nga akong kita gikan sa pagbuhig usa ka piso. Akong gibaligya kini ug 12,000 Meticais [$1, T.B.]. Nagpasalamat ako kang Jehova tungod sa pagpatubo ngadto sa pagkasunoy sa unang piso nga akong gipadako sukad. Buot kong ang akong gasa gamiton alang sa buluhaton sa Gingharian ni Jehova.

“PS: Ang akong amahan mitabang kanako sa pagsulat niini.”

Ang pipila ka tawo naglangkit sa pagkamahinatagon niadtong kinsa adunay sobra sa materyal nga mga butang. Apan, sa dihang atong basahon ang asoy sa Bibliya maylabot sa babayeng balo nga naghulog ngadto sa panudlanang bahandi ug “duha ka gagmayng sinsilyo nga kubos kaayog bili,” atong masabtan nga ang pagkamahinatagon sukdon, dili sa gidaghanon, kondili pinaagi sa hustong kiling sa kasingkasing.—Lucas 21:1-4.

Pabilhan ni Jehova ang matag gasa, bisan unsa pa ka gamay, nga naggikan sa usa ka kasingkasing nga gipalihok sa gugma. Ug siya dagayang manalangin niadtong kinsa mosundog sa iyang pagkamahinatagon pinaagi sa paghatag sa ilang panahon, kusog, o materyal nga mga kahinguhaan alang sa iyang Gingharian.—Mateo 6:33; Hebreohanon 6:10.