Usa ka Talagsaong Tuig sa Pag-apod-apod ug Bibliya

MAS daghang tawo kay sukad masukad ang dunay Bibliya. Mao kanay giingon sa usa ka taho gikan sa United Bible Societies, kay ang pag-apod-apod ug Bibliya sa 1998 milabaw ug kapin sa tunga sa milyon kay sa miaging tuig. Tanantanan, kapin sa 585,000,000 ka Bibliya—sa bug-os o bahin niini—ang giapod-apod sa tibuok yuta. “Makapadasig kini,” matod sa taho. “Dugang pang mga tawo ang naabtan sa Pulong sa Diyos karon.”

Siyempre, dunay kalainan tali sa paghupot ug Bibliya ug pagbasa niana. Pananglitan, usa ka surbi nagpadayag nga kapin sa 90 porsiyento sa mga Amerikano ang dunay labing menos usa ka Bibliya, ug ang katumbas nga gidaghanon nagtuo nga ang Bibliya maoy maayong tinubdan sa moral nga pagtulon-an. Apan, 59 porsiyento lamang ang nag-ingon nga modangop sila sa Bibliya alang sa tambag. Ug 29 porsiyento ang miangkon nga sila “dili kaayo” o kaha “dili gayod” sinati sa Bibliya.

Ang mga Saksi ni Jehova wala lamang magpatik ug mag-apod-apod ug mga Bibliya kondili nagdumala usab ug libreng mga pagtuon sa Bibliya sa balay uban sa mga tawo diha sa kapin sa 230 ka kayutaan. Minilyon sa tibuok kalibotan ang nakabenepisyo karon gikan niining edukasyonal nga programa sa Bibliya. Sila gitabangan sa pagsagubang sa mga suliran nga ilang giatubang karon, ug sila nahibalo kon unsay giingon sa Bibliya bahin sa usa ka masanag nga kaugmaon ilalom sa Gingharian sa Diyos.—Isaias 48:17, 18; Mateo 6:9, 10.

[Mga hulagway sa panid 32]

Mga panagtuon sa Bibliya sa balay sa (nunot sa relo gikan sa ibabaw sa wala) Bolivia, Ghana, Sri Lanka, ug Inglaterra