Imong Mahibaloan ang Umaabot!
Kadaghanang tawo ugdang nga naghunahuna bahin sa umaabot. Gusto nilang magplano, mamuhonan nga maalamon, ug mobating luwas. Apan aduna bay paagi sa pagtino kon unsay anaa sa umaabot?
SA PANINGKAMOT nga masusi kon unsay anaa sa umaabot, gieksperimentohan sa mga tawo ang tanang matang sa mga butang. Ang mga social scientist nga gitawag ug mga futurologist nag-analisar sa bag-ong mga hilig ug naghimo sa ilang mga panagna pinasikad niini. Ang mga ekonomista naghimo sa ingon diha sa ilang kaugalingong pagtuon. Ang mga astrologo ug mga mananagna nagsusi sa mga horoskopyo, mga bolang kristal, ug sa okulto, ug daghan silag sumusunod. Pananglitan, ang Pranses nga astrologong si Nostradamus nagpadayong inila, bisag siya patay na sa daghang siglo.
Kining tanang nag-angkong mga propeta napamatud-ang labihan ka di-kasaligan ug makapahigawad. Ngano? Tungod kay ilang gisalikway si Jehova nga Diyos ug ang iyang Pulong, ang Bibliya. Tungod niini sila napakyas sa pagtubag sa pasukaranang mga pangutanang sama niini: ‘Nganong ako makasegurong ang mga butang nga gitagna sa Bibliya matuman? Sa unsang paagi kini nahiuyon sa katuyoan sa Diyos alang sa mga tawo? Sa unsang paagi ang akong pamilya ug ako makabenepisyo niining mga tagnaa?’ Ang Bibliya nagtubag niining mga pangutanaha.
Ang tagna sa Bibliya labaw usab sa daghang ubang paagi. Dili sama sa astrolohikanhong mga panagna, nagtugot kini sa personal nga kagawasan sa pagpili. Busa, walay usang biktima sa kapalaran. (Deuteronomio 30:19) Ang mga sinulat sama nianang iya ni Nostradamus di-mapuslan sa moral nga paagi, ug ilang gihulipan kining pagkaway-kapuslanan pinaagig misteryo ug paghinobra. Apan ang tagna sa Bibliya adunay lig-ong pasikaranan sa moral. Kini nagsaysay kon nganong ang Diyos magabuhat sumala sa iyang katuyoan. (2 Cronicas 36:15) Ug ang mga tagna ni Jehova dili mapakyas, kay ang “Diyos . . . dili makabakak.” (Tito 1:2) Busa, ang mga tawong gigiyahan sa Pulong sa Diyos nagkinabuhing nalamdagan, may katuyoan, ug malipayong mga kinabuhi nga wala magwaldas-waldas sa ilang bililhong panahon ug mga kahinguhaan diha sa way-pulos nga mga pangagpas.—Salmo 25:12, 13.
Kini ug daghan pang ubang puntos ang gihisgotan sa 1999/2000 “Matagnaong Pulong sa Diyos” nga Distritong mga Kombensiyon sa mga Saksi ni Jehova nga gihimo sa tibuok kalibotan. Ang mga pakigpulong, mga interbiyo, mga pasundayag, ug usa ka drama sa Bibliya nakadani sa pagtagad sa mamiminaw sa kahibulongang espirituwal nga panulondon nga gipahimuslan niadtong nagtuon ug nagpadapat sa matagnaong pulong sa Diyos. Ang mosunod nga artikulo magrepaso sa pipila ka makapahinam nga pangunang mga punto sa kombensiyon.