“Kalig-on sa Kinaiya nga Giinspirar sa Pagtuo”

ANG tuig 1998 mao ang pagluwat, sa dakong pagdayeg sa mga kritiko, sa bag-ong libro sa Pranses nga nag-ulohang Les Témoins de Jéhovah face à Hitler (Mga Saksi ni Jehova Atubangan ni Hitler), nga sinulat ni Guy Canonici. Diha sa iyang pasiuna sa libro, ang tinahod kaayong Pranses nga historyanong si François Bédarida misulat: “Kini maoy gikahimut-an kaayong libro. Dili lamang tungod kay nagpuno kinig usa ka kal-ang, kondili tungod kay husto ang katukma sa panahon sa pagluwat niini. . . . Gawas sa mga batid, kinsa bay nasayod sa kalisdanan sa mga Saksi ni Jehova ilalom sa Pagmando sa Nazi? Bisan pa niana, sa tibuok 12-ka-tuig nga rehimen, sila gilutos sa walay-puas nga kapintas ug kabangis. Nasinati usab nila ang kalisang sa mga kampong konsentrasyon. Sila usab dako kaayog gisakripisyo tungod sa ilang pagtuo ug mga kombiksiyon. Nganong nalimtan man sa kasaysayan kining maong mga Kristohanon? . . .

“Nganong diha may mapintas ug sistematikong paglutos sa usa ka gamay, nagkatibulaag, ug dili-makadaot nga sekta? Mao kini ang dakong punto sa panagsumpaki. Ang mga Saksi sa Alemanya wala lamang maghawas sa gamay kaayong minoriya sa populasyon​—gipakita sa estadistika nga sila maoy mga 20,000 lamang sa katibuk-an nga kapin sa 60 ka milyong molupyo​—apan silang tanan makigdaitong mga lungsoranon nga nagtahod sa balaod ug walay tawong gipameligro, nga buot lamang nga magtrabaho ug magpadako sa ilang mga anak sa hustong paagi. . . .

“Giharong niining maong paglutos ang malig-on ug madaogong espirituwal nga pagpakigbisog sa mga magtutuong may katakos nga tugbangan ang puwersa sa panggawas nga mga pagpit-os pinaagi sa pangsulod nga puwersa sa ilang pagtuo kang Jesu-Kristo, nga nagsugod sa pisikal nga kapintasan sa polisya sa Estado​—ngadto sa punto sa pagkabayani ug pagkamartir.”

Ang asoy bahin sa mga Saksi ni Jehova nga nag-antos ingong mga martir tungod sa ilang Kristohanong pagtuo atubangan sa relihiyosong pagkadili-matinugoton maoy kusganon kaayo. Sa paghatag ug opinyon bahin sa maong libro, ang nangunang Pranses nga Katolikong mantalaan, nga La Croix, mahinuklogong midugang: “Kon bahin sa ilang dili kaayo iladong kasaysayan, si Guy Canonici nakatigom ug daghan kaayong testimonya nga makapahingangha sa tawo kon makita ang kalig-on sa kinaiya nga giinspirar sa pagtuong gipahayag diha sa kinayanohang mga pulong, usa ka pagtuo nga hangtod sa kataposan dili mabungkag bisan taliwala sa mga bata. Kini nga paghandom angay nga magtaganag kasaysayan sa naglungtad karon nga debate bahin sa Kristohanong kinaiyahan sa mga Saksi ni Jehova.”