“Malipayong Bana sa Makabibihag nga Asawa”

USAHAY, tulisokon sa pipila ka tawo ang mga Saksi ni Jehova nga nagbungkag ug mga kaminyoon. Hinunoa, ang daghang malamposong kaminyoon diin usa lamang ka kapikas ang Saksi ni Jehova nagpakitang kini layo ra sa tinuod. Ang pagsunod sa tambag sa Bibliya diha sa pamilyahanong kinabuhi magpatunghag malipayong mga kaminyoon, sumala sa gipakita sa mosunod nga sulat nga gipatik sa usa ka mantalaang Pranses.

“Sa halos 28 ka tuig na karon, ako nahimong malipayong bana sa makabibihag nga asawa nga usa sa mga Saksi ni Jehova. Iyang gimatuto ang akong lima ka anak, nga niini duha ang dili iyaha, nga may samang pagtagad ug dakong gugma. Ingong sa pagkakaron usa ka direktor sa kompaniya nga may 45 ka empleyado, akong ipasalig kaninyo nga siya nakaamot ug dako sa akong propesyonal nga kalamposan. Mao nga sa pagkakita nako sa usa ka artikulo sa mantalaan nga ginabasa ko kanunay nga nagpresentar sa mga Saksi ni Jehova ingong hulga sa rehiyon sa Lot-et-Garonne, ako midesidir sa paghatag kaninyog awtoritatibong ebidensiya.”

Ang sulat nag-ingon usab: “Dili sila manigarilyo ug maghuboghubog. Hulga ba kana? Sila maoy matinugotong mga Kristohanon kinsa dili magpugos ni bisan kinsa sa pagsunod sa mga lagda nga ilang gisunod. Hinunoa, panig-ingnan sila sa daghang paagi. . . . Wala sila malangkit sa mga eskandalo sa panalapi o sa pagpayuhot ug droga. Wala sila maghimog saad sa pagpabiling ulay, ug ako makapasalig kaninyo, nagkinabuhi silag normal nga mga kinabuhi. . . .

“Maayo tingaling mangutana mo nako: Busa nganong dili ka man usa sa mga Saksi ni Jehova? Tungod kay ang Kristohanong pagtuo ug estriktong moralidad gikinahanglan, ug dili kini daling makaplagan taliwala sa kasagarang mga tawo.”