Pakigdait sa Kalibotan—Gikan sa Unsang Tinubdan?
ANG globalisasyon ba sa edukasyon ug relihiyon magdalag pakigdait sa kalibotan? Kini ang pangandoy ni Dr. Robert Muller, kanhing luyoluyong sekretaryo-heneral sa Hiniusang Kanasoran ug gihatagan sa 1989 UNESCO Prize for Peace Education. Sumala sa gitaho sa mantalaang The Vancouver Sun, si Dr. Muller “kombinsido nga ang tanang estudyante sa kalibotan kinahanglang matudloan sa usa ka kurso sa pagtuon sa mga kamatuoran ug prinsipyo bahin sa planeta, katawhan ug kawalay-kapintasan.” Siya naghanduraw sa panahon sa dihang sa tibuok kalibotan ang tanang institusyon sa pagkat-on magtudlo sa mga bata bahin sa HK ingong ang kinamaayohang paglaom alang sa pakigdait. Siya nagtuo usab nga ang “tanang relihiyon sa kalibotan mahimo gayong mga membro sa usa ka bag-ong naporma nga samag-HK nga organisasyon nga gitawag ug Hiniusang mga Relihiyon,” nagtaho ang Sun. Dayon “ang tanang relihiyosong pagtulon-an magpasiugda sa kawalay-kapintasan.”
Ang pakigdait sa kalibotan mahimo ba kahang usa ka kamatuoran? Segurado gayod! Apan dili pinaagi sa bisan unsang tawhanong ahensiya. Kapin sa 2,700 ka tuig kanhi, ang usa ka dinasig nga magsusulat miila sa labawng tinubdan sa edukasyon alang sa pakigdait sa dihang siya mitagna nga ang matarong-ug-kasingkasing nga mga tawo “pagatudloan ni Jehova,” ug ang ilang pakigdait mahimong “dagaya.”—Isaias 54:13.
Ang Diyos mao ang usa “kinsa naghatag ug kalinaw,” nag-ingon ang Bibliya. (Roma 16:20) Bisan karon ang kahibulongang tibuok-kalibotang programa sa edukasyon nagapadayon samtang si Jehova nagatudlo sa iyang katawhan sa ‘pagpangita sa pakigdait ug pagpangagpas niini,’ sa ‘paghimo sa ilang mga espada nga mga punta sa daro,’ ug sa dili na ‘pagkat-on pa sa gubat.’—1 Pedro 3:11; Isaias 2:2-4.
Ang pagsimba nga gipasukad sa kamatuoran, nga bulag gikan sa pagkasalingkapaw ug panglimbong, maoy giuyonan ug gipanalanginan sa Diyos. (Mateo 15:7-9; Juan 4:23, 24) Ang matuod nga pagsimba lamang, nga bug-os nga kaharmonya sa Pulong sa Diyos, ang makapatunghag katawhan kinsa nagkinabuhi sa pakigdait ug panaghiusa ug kinsa adunay tiunay nga gugma sa usag usa.—Juan 13:35.
Aron sa pagkat-on ug dugang kon unsay giingon sa Pulong sa Diyos mahitungod sa kalinaw sa kalibotan, dapiton namo kamo sa pagkontak sa mga magpapatik niini nga basahon.