“Akong Nabatyagan ang Malinawong Palibot”

SA ka nagsultig-Aleman nga lalaki miadto sa usa ka kombensiyong giorganisar sa mga Saksi ni Jehova aron sa “pagpangespiya” diha sa mga Saksi. Ngano? Ang iyang tumong mao ang “pagyagyag niining sektaha ug pagluwas sa iyang mga higala gikan sa pagkahisalaag.” Human sa pagtambong sa kombensiyon, misulat siya sa iyang mga higala:

“Sa dihang ako miabot sa dapit sa kombensiyon, nagduhaduha ako kon kini ba ang hustong dapit. Walay usa nga nagbarog sa gawas sa estadyum, ug walay mga basura o mga lata sa serbisa diha sa salog. Samtang ako nagakaduol, nakita ko ang duha ka lalaki diha sa entrada sa estadyum. Gitimbaya nila ako ug gipasulod ako.

“Akong gidahom nga madunggan ang kabanha gikan sa libolibong gidahom nga atua didto, apan malinawon kaayo kadto. ‘Aw,’ gihunahuna ko, ‘tingali adunay pipila lamang ka mga tawo ang nagkatag sa tibuok nga dapit.’

“Sa dihang ako misulod, ang akong pagtagad dihadiha nabihag sa usa ka drama nga ginadula diha sa plataporma. Sa ulahi na lamang ako nakaamgo nga ang estadyum napuno sa libolibong atentibong mga mamiminaw. Akong nabatyagan ang malinawong palibot. Kon unsay akong nadunggan, nakita, ug nabatyagan sa nahibiling panahon sa kombensiyon nagbilin ug usa ka lawom nga impresyon kanako.

“Sa pagpakig-uban sa mga Saksi, akong namatikdan ang ilang malipayong mga nawong ug mahigugmaong hitsura. Sa kalit, dili nako mapugngan ang paghunahunang, ‘Kini gayod mao ang katawhan sa Diyos!’”

Imbes nga ‘luwason ang iyang mga higala gikan sa pagkahisalaag,’ ang batan-ong lalaki mihangyo kanila nga motuon sa Bibliya uban niya. Ang resulta? Karon, siya maoy usa ka Kristohanong ansiyano. Siya ug ang iyang pamilya aktibo diha sa usa sa mga kongregasyon sa Zug, Switzerland.