Pagbantay sa Simoniya!
SI Simon sa Samaria tinamod pag-ayo diha sa iyang komunidad. Nagkinabuhi siya sa unang siglo K.P., ug ang katawhan nadani pag-ayo sa iyang mga kalaki sa salamangka mao nga sila miingon bahin kaniya: “Kining tawhana mao ang Gahom sa Diyos, nga matawag Dako.”—Buhat 8:9-11.
Hinunoa, human si Simon nahimong bawtismadong Kristohanon, iyang namatikdan ang usa ka gahom nga mas labaw pa kay sa iya kanhing gipasundayag. Mao kadto ang gahom nga gihatag ngadto sa mga apostoles ni Jesus, nga nagpaarang kanila sa pagpaambit ngadto sa uban ug milagrosong mga gasa sa balaang espiritu. Nahingangha pag-ayo si Simon mao nga siya mitanyag ug salapi ngadto sa mga apostoles ug mihangyo: “Hatagi usab ako niini nga awtoridad, aron nga si bisan kinsa nga patongan ko sa akong mga kamot makadawat ug balaang espiritu.”—Buhat 8:13-19.
Gibadlong ni apostol Pedro si Simon, nga nag-ingon: “Malaglag pa unta ang imong pilak uban kanimo, tungod kay ikaw naghunahuna nga makapanag-iya sa libreng gasa sa Diyos pinaagig salapi. Wala kay bahin ni pahat niining butanga, kay ang imong kasingkasing dili tul-id sa panan-aw sa Diyos.”—Buhat 8:20, 21.
Niining maong asoy sa Bibliya naggikan ang pulong nga “simoniya,” nga gihubit ingong “ang kasal-anan sa pagpalit o pagbaligyag mga posisyon o mga promosyon diha sa simbahan.” Ang New Catholic Encyclopedia nag-ila nga ilabina gikan sa ika-9 hangtod sa ika-11 nga siglo “ang simoniya kaylap sa mga monasteryo, sa mas ubos nga klero, sa episkopasiya, ug bisan sa papado.” Ang ikasiyam nga edisyon sa The Encyclopædia Britannica (1878) nag-ingon: “Ang pagtuon sa kasaysayan sa sekretong mga miting sa Papa magkombinsir sa estudyante nga wala gayoy eleksiyon nga gihimo sukad nga walay lama sa simoniya, samtang sa kadaghanang higayon ang simoniya nga gibuhat diha sa sekretong miting maoy kinagrabehan, labing makauulaw, ug labing dayag nga matang.”
Ang matuod nga mga Kristohanon karon kinahanglang magbantay sa simoniya. Pananglitan, ang pipila tingalig dagayang mohatag ug sobrang pagdayeg o daghang gasa niadtong makahatag kanilag dugang nga mga pribilehiyo. Sa kasukwahi, kadtong makahatag sa maong mga pribilehiyo tingalig magpakitag paboritismo kanilang makaarang—ug kasagarang mahinamon—nga mohatag kanilag mga gasa. Kining duha ka kahimtang naglangkit sa simoniya, ug ang Kasulatan tin-awng nagsaway sa maong dalan. “Busa, paghinulsol niining imong pagkadaotan,” giawhag ni Pedro si Simon, “ug pangamuyo kang Jehova nga, kon posible, ang laraw sa imong kasingkasing [“kining plano nimo,” New Jerusalem Bible] mapasaylo kanimo; kay akong nakita nga ikaw usa ka makahilo nga apdo ug usa ka bugkos sa pagkadili-matarong.”—Buhat 8:22, 23.
Ikalipay, nasabtan ni Simon ang pagkaseryoso sa iyang sayop nga tinguha. Nagpakiluoy siya sa mga apostoles: “Pangamuyo kamo alang kanako ngadto kang Jehova nga walay usa sa mga butang nga inyong giingon modangat kanako.” (Buhat 8:24) Sa pagpamati sa hinungdanong leksiyon nga anaa niining maong asoy, ang matuod nga mga Kristohanon naningkamot sa paglikay sa bisan unsang lama sa simoniya.