Mga Timaang-Poste Diha sa Dalan sa Kinabuhi

KON ikaw nagabiyahe sa usa ka dili-sinati nga dalan o agianan, imo bang isipon ang mga timaang-poste ingong babag? Lagmit dili! Sa walay duhaduha isipon nimo kana ingong usa ka tabang aron motabang kanimo nga dili masaag sa ruta nga motultol sa imong destinasyon.

Apan, komosta ang pagbiyahe sa dalan sa kinabuhi? Madumala ba kana nga malamposon nga walay mga timaang-poste? Usa ka karaang manalagna sa Diyos miila sa mga limitasyon sa katawhan niining bahina. Siya miingon: “Ako nahibalo, Oh GINOO, nga ang mga dalan sa tawo dili sa iyang kaugalingong pagpili; ni alang sa tawo nga motino sa iyang dalan sa kinabuhi.”​—Jeremias 10:​23, The New English Bible.

Nan, asa man makaplagi ang gikinahanglang pagtultol? Ang kasaligang tinubdan sa maong giya mao ang Maglalalang sa tawo, ug ang mahulagwayong mga timaang-poste makaplagan diha sa Bibliya. Si Jehova, pinaagi sa iyang Pulong, nag-ingon: “Ang imong igdulungog makabati sa pulong sa imong luyo nga nag-ingon: ‘Kini ang Dalan. Lakaw niana, kamong katawhan,’ kon kamo moliko sa tuo o kon kamo moliko sa wala.”​—Isaias 30:21.

Oo, ang Pulong sa Diyos naghatag ug kasaligang giya sa matag bahin sa atong kinabuhi. (Isaias 48:​17; 2 Timoteo 3:​16, 17) Apan, ikasubo nga ang kadaghanang tawo nagabiyahe diha sa agianan sa kinabuhi nga walay pagtultol sa Diyos. (Mateo 7:13) Bisan pa niana, ang mga timaang-poste lig-ong napahimutang! Sundon ba nimo kini samtang ikaw nagalakaw diha sa dalan sa kinabuhi?