Ang Gubat nga Naglaglag sa Ika-19ng Siglo

1914

NAMALANDONG bahin sa bag-ong milenyo, si Charley Reese, kolumnista sa mantalaang The Orlando Sentinel, misulat: “Ang gubat sa 1914-18 nga naglaglag sa ika-19ng siglo wala pa matapos.” Unsay iyang gipasabot? Siya misaysay: “Ang kasaysayan wala gamhig mga petsa. Ang ika-19ng siglo​—nga gihubit ingong usa ka hugpong sa mga tinuohan, pagdahom, tinamdan ug moralidad​—wala matapos sa Ene. 1, 1901. Kini natapos sa 1914. Mao usab kanay pagsugod sa ika-20ng siglo, nga gihubit sa samang paagi. . . .

“Halos ang tanang panagbangi nga gikabalak-an nato sa tibuok natong kinabuhi maoy tungod sa maong gubat. Halos ang tanang intelektuwal ug kultural nga dagan sa mga hitabo nga atong naagoman maoy tungod sa maong gubat. . . .

“Sa akong hunahuna kini nakadaot sa ingon tungod kay kini naglumpag sa pagtuo sa katawhan nga ang mga tawo makakontrolar sa ilang dulnganan. . . . Ang gubat nagpahinabo sa mga tawo sa pagbiya sa maong pagtuo. Walay usa sa matag kiliran ang naghunahuna nga maingon kana nianang paagiha. Naglaglag kini sa Britaniko ug Pranses nga mga imperyo. Nagpatay kini sa kinamaayohang mga lalaki sa tibuok nga kaliwatang Britaniko, Pranses, ug Aleman. . . . Sa mubong yugto sa panahon, nakapatay kinig 11 ka milyong tawo.”

Sa kapin ug 120 ka tuig, ang mga Saksi ni Jehova nagtumong sa 1914 ingong kataposan sa gitawag ni Jesus nga “tinudlong mga panahon sa mga nasod.” (Lucas 21:24) Sa maong tuig, ang nabanhaw ug nahimayang si Jesu-Kristo naentrono ingong Hari sa langitnong Gingharian. Pinaagi sa maong Gingharian, si Jehova nga Diyos permanenteng maghanaw sa tanang pag-antos nga maoy nagpaila niining sigloha.​—Salmo 37:​10, 11; Ecclesiastes 8:​9; Pinadayag 21:​3, 4.

[Picture Credit Line sa panid 32]

U.S. National Archives photo