“Hupti ang Inyong Pagtuo”
Ang usa ka grupo sa mga Saksi nagsangyaw diha sa usa sa halos 30 ka isla nga naglangkob sa Cyclades Islands sa Gresya. Samtang duha kanila nanglakaw sa dalan, nakatagbo nila ang usa ka polis nga miingon kanila nga mosunod kaniya ngadto sa estasyon sa polis. Wala madugay human sa ilang pag-abot sa estasyon sa polis, mibagting ang telepono. Kadto mao ang pari sa balangay. “Nadunggan kong may mga Saksi ni Jehova sa balangay,” siya miingon. “Oo, naa koy duha diri,” mitubag ang polis. “Moanha ko karon dayon.” Gikan sa tono sa kabildohay, ang mga igsoon medyo nangahadlok.
Sa iyang pag-abot, hinunoa, ang pari mipahiyom, milamano kanila, ug milingkod sa lingkoranan tupad sa polis. Samtang nagpadayon ang panaghisgot, ang polis nagmalalison samtang ang pari nagpabiling makataronganon ug matinahuron. Iyang giingnan ang polis nga dili pakamenoson ang mga Saksi, ug siya midugang: “Makatubag sila sa bisan unsang pangutana tungod kay nabansay sila sa Tunghaan sa Teokratikanhong Ministeryo. Mas sayon pa ang pag-uyog sa patukoranan sa kalibotan kay sa pag-usab sa pagtuo sa usa sa mga Saksi ni Jehova.”
Samtang nagsangyaw sa pagkasunod buntag, nakita sa mga igsoon pag-usab ang pari ug nangutana: “Nganong mahigalaon ka kaayo kanamo sa panahon sa panaghisgot didto sa estasyon sa polis?” Giingnan sila sa pari nga siya nasinati sa daghang Saksi sa Syros ug nga siya nagabasa sa mga magasing Bantayanang Torre ug Pagmata! sa daghang tuig. Sa pagkatinuod, sa ubay-ubayng okasyon mikuha siyag magasin nga Bantayanang Torre, gitago kini sa usa ka polder, ug gigamit kini sa iyang sermon sa simbahan. Siya miingon: “Ambot lang kon makahuloganon pa ba ang kinabuhi kon wala nako ang inyong literatura. Mao kiniy naghatag kanakog paglaom.”
Sa ulahi, giingnan sa pari ang mga Saksi: “Kinahanglang sultihan ko kamo sa usa ka butang. Hupti ang inyong pagtuo. Ayaw pagpakasayop sa pagbiya niana. Ang akong gisulti kaninyo karon mao ang labing maayong sermon nga akong gikahatag sukad, ug wala nako kini isulti sa akong baba lamang; naggikan gayod kini sa akong kasingkasing.”