Makaila Ka ba sa Husto Gikan sa Sayop?
“Ako mismo maoy responsable sa pagpatay sa mga 25 ka tawo. . . . Mahanduraw nako kana kada gabii, kada adlaw. Duna akoy makalilisang nga mga damgo. . . . Kon moadto ako ug usa ka dapit makita nako ang usa ka nawong nga magpahinumdom kanako sa mga tawo nga akong gipatay. Tataw nakong makita kana, sama ra nga nahitabo kana karong adlawa, karon mismo. . . . Dili nako mapasaylo ang akong kaugalingon tungod sa mga butang nga akong nahimo.”—V.S. “Gimandoan ako nga mosulod didto ug laglagon ang kaaway. . . . Wala ako maghunahuna sa kaaway ingong mga lalaki, mga babaye ug mga bata. . . . Gibati nako niadtong tungora ug mao man usab karon nga ako milihok sumala sa gisugo kanako, ug ako nagtuman sa gimando kanako ug wala ako hasola sa pagbuhat niana.”—W.C.
SA Marso 16, 1968, ang duha ka lalaki nga gikutlo sa ibabaw miapil sa gihukman sa ulahi nga makauulawng krimen sa gubat. Sila, duyog sa ubang mga sundalo, misulod sa usa ka gamayng balangay sa Vietnam ug nagpatay sa gatosan ka sibilyan—lakip ang mga babaye, mga bata, ug tigulang nga mga lalaki. Apan matikdi ang magkalahing reaksiyon niining duha ka sundalo. Ang unang sundalo tin-awng naguol sa iyang nahimo. Ang ikaduha mibati nga makataronganon ang iyang mga lihok. Sa unsang paagi ang duha ka tawo mosanong nga lahi kaayo sa mao gihapong kasinatian?
Ang tubag dunay kalabotan sa tanlag—usa ka hinatag-Diyos nga katakos nga motabang kanato sa paghimog prangkang pagtimbangtimbang sa atong kaugalingon ug paghukom sa atong mga lihok ug mga tuyo. Ang tanlag maoy magpaamgo diha sa sulod nato kon unsay husto ug sayop.
Sa dihang maghimog mga desisyon, ang ubang mga tawo modangop sa panultihon nga, “Himoang giya ang imong tanlag.” Ikasubo, hinunoa, ang tanlag dili kanunayng kasaligan. Sa pagkatinuod, daghan ang nagtugot ug gani naghimo ug makalilisang nga mga buhat, ug wala gayod sila hasola sa ilang tanlag. (Juan 16:2; Buhat 8:1) Sumala sa giingon kanhi sa Ingles nga tigsulat ug nobela nga si Samuel Butler, ang tanlag “sa dili madugay dili na mosanong niadtong dili gustong maminaw niana.”
Makasalig ka ba sa imong tanlag? Ang tubag nagdepende pag-ayo kon unsa ka maayo ang pagbansay niini, sumala sa ipakita sa sunod nga artikulo.
[Picture Credit Line sa panid 3]
Esena sa gubat sa ibabaw: Letrato sa U.S. Signal Corps