Mga Magmamantala sa Gingharian Nagtaho

Mapaubsanong Pagpahiuyon sa Dalan ni Jehova

“PANGITAA ninyo si Jehova, kamong tanang maaghop sa yuta.” Kining imbitasyona, nga gimantala sa Hebreohanong propetang si Sofonias kapig 26 ka siglo kanhi, gipaabot gihapon ngadto sa mga tawo sa tibuok yuta karong adlawa. (Sofonias 2:3) Unsay kahulogan nga pangitaon si Jehova? Ang pagbuhat niini magsugod sa pagkuhag kahibalo mahitungod sa bugtong matuod ug buhing Diyos, si Jehova.​—Jeremias 10:​10; Juan 17:3.

Hinuon, ang pagkuhag kahibalo sa kaugalingon dili motultol sa inuyonang pagbarog atubangan sa Diyos. Aron maangkon ang pag-uyon sa Diyos, kinahanglang ipadapat usab sa usa ka tawo kining kahibaloa. Sa unsang paagi? Pinaagi sa mapaubsanong pagpahiuyon sa iyang panghunahuna ug panggawi ngadto sa mga sukdanan sa Diyos, sumala sa giilustrar sa mosunod nga kasinatian gikan sa Suriname.​—Efeso 4:​22-24.

Si Eddy, usa ka maestro nga mga 35 anyos na sa edad, nangandoy ug makapatagbawng mga tubag sa mga pangutana nga sama sa: ‘Unsa ba ang papel nga gidula sa relihiyon diha sa katilingban karon?’ ug ‘Ang Bibliya ba, nga karaang basahon, nahiuyon sa modernong siyensiya?’ Sa dihang ang mga Saksi ni Jehova miduaw ug mihatag ug binase-sa-Bibliya nga mga tubag sa maong mga pangutana, si Eddy namati pag-ayo. Siya gani nagnota aron susihon ang mga katin-awan sa mga Saksi.

Sa nangagi, si Eddy mianib sa usa ka relihiyon nga nagtudlo kaniya nga ang mga tawo mao ang resulta sa pag-ayom-ayom sa Diyos sa mga aliwas. Busa sa gitanyagan siya sa mga Saksi sa basahong Life​—How Did It Get Here? By Evolution or by Creation? iya dayong gidawat kadto. Ang tin-awng saysay sa basahon sa asoy sa paglalang sa Bibliya nakapahingangha kaniya. Pinaagi sa iyang pagtuon sa Bibliya, siya nakombinsir nga iyang nakaplagan ang kamatuoran!

Apan sa maong panahon giatubang niya ang usa ka pagsulay. Si Eddy nagpuyo sa usa ka balay diin ang pagpangawat ug pagpanglimbong maoy paagi sa pagkinabuhi. Sa ingon, naatubang niya ang pagpili: sundon ang daotang pagkinabuhi sa iyang mga kauban sa kuwarto o isalikway ang maong panggawi sa pagdapig sa usa ka paagi sa kinabuhi nga maghimaya sa Diyos. Sa kamaalamon, gipili ni Eddy ang ulahi. Giputol niya ang tanang daotang panag-uban ug mipahawa sa balay.​—1 Corinto 15:33, 34.

Kusog nga miuswag si Eddy human sa pagsugod niya pagtambong sa mga tigom sa Kingdom Hall. Siya miuswag usab sa iyang pagpamesti ug pagpamostura ug misugod sa pagsulti sa iyang mga higala ug mga paryente sa iyang natun-an. Sa ulahi, midako ang iyang kalipay sa dihang giaprobahan siya nga moapil sa pagsangyaw sa dayag sa “maayong balita.” (Mateo 24:​14; Buhat 20:20) Sa Disyembre 1996 ang dugay-nang-gipaabot nga adlaw miabot sa dihang gipasimbolohan niya ang iyang pagpahinungod kang Jehova pinaagi sa bawtismo sa tubig.

Matag tuig, ginatos ka libong matinud-anon-ug-kasingkasing nga mga tawo nagadawat sa imbitasyong “pangitaa si Jehova.” Sa pagbuhat niana, nasinati nila ang kamatuoran sa Proverbio 22:​4, nga nag-ingon: “Ang sangpotanan sa pagpaubos ug ang kahadlok kang Jehova mao ang bahandi ug himaya ug kinabuhi.” Oo, pinaagi sa mapaubsanong pagpahiuyon ngadto sa dalan ni Jehova, ang mga nahigugma sa kamatuoran nagtagamtam sa maong mga panalangin karon, ug masaligong nagpaabot sa walay-kataposang mga panalangin dinhi mismo sa yuta.​—Salmo 37:29.

[Mga mapa sa panid 18]

(For fully formatted text, see publication.)

Caribbean Sea

GUYANA

SURINAME

FRENCH GUIANA

BRAZIL

[Credit Line]

Globo: Mountain High Maps® Copyright © 1997 Digital Wisdom, Inc.