Ang “Usay-Tudlo nga Bibliya”

NAPARALISAR human hampaka ug sakit, si Joseph Schereschewsky makasulat lamang pinaagig pagmakenilya, nga ginamit ang usa ka tudlo. Bisan pa niana nakab-ot niya ang iyang tumong​—ang paghubad sa Bibliya ngadto sa Ininsek, usa sa kinalisorang mga pinulongan nga mahanas sa usa ka langyaw.

Natawo nga usa ka Hudiyo, si Schereschewsky misusi ug midawat sa Kristiyanidad ingon nga edaran. Sa kadugayan siya nahimong misyonaryo sa Tsina. Didto, miapil siya sa daghang proyekto sa paghubad, nga nagsugod ingon ka sayo sa 1866 ug nagpadayon hangtod sa unang mga tuig sa ika-20ng siglo. Tungod sa iyang Hudiyohanong kagikan, si Schereschewsky mas labawng pamilyar sa Hebreohanon kay sa iyang kaubang mga eskolar. Busa, gisaligan siya sa paghubad sa tibuok Hebreohanong Kasulatan. Ngadto sa kataposan sa iyang dugay nga trabaho, siya usab nakahimog Ininsek nga hubad sa tibuok Bibliya nga may mga reperensiya.

Ingong maghuhubad sa Bibliya, si Joseph Schereschewsky maoy masibotong tigpaluyo sa mga bersiyon diha sa komon nga pinulongan. Apan ang iyang tahas maoy usa nga dili masayon. Ang iyang natampo sa Ininsek nga Bibliya maoy talagsaon, miingon ang The Book of a Thousand Tongues, “tungod kay kini malangkobon kaayo ug nalampos luyo sa daghan kaayong kakulian.”

Human nga naparalisado ang mga kamot ni Schereschewsky, siya sa gihapon mihinayhinay pagpadayon sa iyang trabaho. Ang pagmakenilya nagkinahanglag dakong paningkamot, tungod kay dili na niya magamit sa normal ang iyang mga kamot. Busa gitawag niya kini nga hubad nga iyang usay-tudlo nga Bibliya. Aron mahimo kini bisan pa sa iyang mga kakulian, si Schereschewsky milahutay sulod sa 25 ka tuig. Tungod kay wala mohunong, siya miambit sa paghimo sa Pulong sa Diyos nga masabot sa Ininsek​—ang pinulongan nga gisulti sa mas daghang tawo kay sa bisan unsang ubang pinulongan.

[Picture Credit Line sa panid 11]

Duha ka hulagway: Kortesiya sa American Bible Society Archives