Mga Doktor, mga Huwes, ug mga Saksi ni Jehova

BALIK niadtong Marso 1995, ang mga Saksi ni Jehova mipasiugdag duha ka seminar sa Brazil. Ang katuyoan? Aron hangyoon ang pakigtambayayong sa medikal ug legal nga mga kawani kon ang pasyente sa ospital usa sa mga Saksi ni Jehova ug dili magpadugang ug dugo.​—Buhat 15:29.

Ikasubo, ang mga doktor sa pipila ka kaso midumili sa kagustohan sa mga pasyenteng Saksi ug mikuhag mga mando sa korte aron ipugos ang pagdugang ug dugo. Sa maong mga kahimtang ang mga Saksi mogamit ug bisan unsang legal nga mga paagi nga mabatonan aron panalipdan ang ilang kaugalingon. Bisan pa niana, pilion nila ang pagkigtambayayong inay kay pakigharong. Busa, ang mga seminar mipasiugda nga adunay daghang kapuli sa homologous nga pagdugang ug dugo nga tambal ug nga ang mga Saksi ni Jehova malipayong modawat niini.a

Ang panagtigom sa Rehiyonal nga Konseho sa Medisina sa São Paulo mipaluyo na sa baroganan sa mga Saksi. Niadtong Enero 1995 kini mihukom nga kon adunay pagtutol sa gisugyot nga pagtambal sa doktor, adunay katungod ang pasyente sa pagdumili niana ug pagpili ug ubang doktor.

Ikalipay, sa pagkakaron aduna nay gatosan sulod sa medikal nga komunidad sa Brazil kinsa andam nga mopadapat ug walay-dugo nga pagtambal ngadto sa ilang mga pasyente nga mohangyo niini. Sukad sa Marso 1995 nga mga seminar, ang pakigtambayayong tali sa mga doktor, mga huwes, ug mga Saksi ni Jehova sa Brazil miuswag ug dako. Sa 1997 ang medikal nga magasin sa Brazil nga Âmbito Hospitalar nagpatik ug usa ka artikulo nga nag-insistir sa mga katungod sa mga Saksi ni Jehova nga tahoron ang ilang baroganan bahin sa isyu sa dugo. Kini karon giila na pag-ayo nga, ingon sa gisulti sa Rehiyonal nga mga Konseho sa Medisina alang sa mga estado sa Rio de Janeiro ug São Paulo, “ang katungdanan sa doktor sa pagpanalipod sa kinabuhi sa iyang pasyente angay dili maglapas sa iyang katungdanan sa pagpanalipod sa katungod sa pasyente sa pagpili.”

[Mga footnote]