Laglagon ba sa Diyos ang Kalibotan?
SUMALA kang Papa Juan Paulo II, ang katawhan makalantaw sa kaugmaon nga may pagsalig. Sa tibuok kasaysayan, siya nagpahayag, “ang mga tawo nagpadayon sa pagbuhat ug kasal-anan, lagmit grabe pa kay sa gihubit sa wala pa ang baha.” Bisan pa niana, ang papa mipatin-aw, “gikan sa mga pulong sa pakigtugon nga gihimo sa Diyos kang Noe masabtan nato nga karon wala nay sala nga magpahinabo sa Diyos nga laglagon ang kalibotan nga siya mismo ang naglalang.”
Tinuod ba nga dili na gayod laglagon sa Diyos ang kalibotan? Ang Bibliya nagsulti nga human sa Lunop, ang Diyos miingon kang Noe: “Dili na mapuo pag-usab ang tanang unod pinaagi sa mga tubig sa lunop, ug dili na gayod mahitabo ang lunop nga maglaglag sa yuta.” (Genesis 9:11) Ang papa miingon nga niining mga pulonga, ang Diyos “obligado mismo sa pagtipig [sa yuta] gikan sa pagkalaglag.”
Gitin-aw sa Bibliya nga dili tugotan sa Maglalalang nga malaglag ang atong planeta. “Ang yuta magpabilin sa walay kataposan,” nag-ingon ang Bibliya. (Ecclesiastes 1:4) Apan labaw pa ang makat-onan gikan sa Lunop—butang nga wala komentohi sa papa.
Si Jesus miingon nga ang mga kahimtang sa yuta panahon sa iyang umaabot nga presensiya mahimong “sama gayod sa mga adlaw ni Noe,” sa dihang ang mga tawo “wala magmatikod hangtod miabot ang baha ug mibanlas kanilang tanan.” (Mateo 24:37-39) Sa susama, si apostol Pedro misulat nga maingon nga “ang kalibotan niadtong panahona nakaagom sa kalaglagan sa dihang gilunopan kini sa tubig,” mao man usab “ang adlaw sa paghukom ug sa kalaglagan sa mga tawong dili-diyosnon” nagahulga sa presenteng kalibotan.—2 Pedro 3:5-7.
Nakalimtan ba ni Jesus ug Pedro ang mahitungod sa pakigtugon sa Diyos kang Noe? Wala gayod! Ingon sa iyang gibutyag sa pakigtugon kang Noe, ang Diyos dili na mogamit ug mga tubig sa baha sa pagtapos niining daotang sistema sa mga butang. Hinunoa, iyang gamiton ang gahom sa “Hari sa mga hari ug Ginoo sa mga ginoo,” si Jesu-Kristo. (Pinadayag [Apocalipsis] 19:11-21) Busa, sumala sa Bibliya, ang yuta dili malaglag, apan ang “kalibotan” sa daotang katawhan ang tinong malaglag. (Proverbio 2:21, 22; Pinadayag 11:18) Human niana, “ang mga matarong mismo magapanunod sa yuta, ug magapuyo sila sa ibabaw niini sa walay kataposan.”—Salmo 37:29.