Usa ka Mahagitong Tubag

ANG Catholic Herald, usa ka mantalaan sa Romano Katoliko sa Britanya, sa dili pa dugay nagpatik sa mosunod nga sulat gikan sa usa ka magbabasa sa Wales: “Usa ka gabii, duha ka Saksi ni Jehova ang miduaw sa akong pultahan. Gisultihan ko sila nga ang Iglesya Katolika ang migarantiya sa pagkamatinud-anon sa Bag-ong Testamento nga ilang gikutlo. Sa akong kahibulong, usa kanila miuyon. ‘Oo,’ siya miingon, ‘kamo migarantiya niini apan wala ninyo kini sunda. Si Jesus miingon, “maghigugmaay kamo sa usag usa ingon sa akong paghigugma kaninyo,” apan kamo nagpinatyanay sa usag usa. Sa miaging gubat, ang mga Katoliko mipatay sa mga Katoliko, apan walay Saksi ni Jehova ang mipatay sa usa ka [kaubang] Saksi.’ Unsay akong mahimo kondili sa pag-uyon? Sa unsang paagi kita makaampo alang sa panaghiusa sa atong ‘nahimulag nga mga igsoon’ sa dihang walay tinuod nga panaghiusa sa atong taliwala? Dili ba angay natong tul-iron una kini nga eskandalo?”​—Juan 15:12.

Ang duha ka gubat sa kalibotan niining ika-20ng siglo pulos nagsugod sa Kakristiyanohan ug nakakalas ug mga 50 ka milyon ngadto sa 60 ka milyong kinabuhi. Apan, sa pagkamatinud-anon ikasulti nga ang mga Saksi ni Jehova wala makigbahin niadtong mga gubata, ni sila nalangkit sa bisan unsang mga panag-away nga sa pagkakaron nagakahitabo. Sa unsang paagi kini posible? Mapuslanon alang kanimo ang pagsusi ug dugang bahin sa gamhanang mga bugkos sa Kristohanong gugma ug panaghiusa nga nabatonan sa kapin sa lima ka milyong Saksi ni Jehova sa tibuok kalibotan.​—Itandi ang Isaias 2:4.

[Picture Credit Line sa panid 32]

Letrato sa U.S. National Archives