Sa Dihang Moduaw ang mga Saksi ni Jehova

Unsay angayng buhaton sa mga Katoliko sa dihang usa sa mga Saksi ni Jehova moduaw sa ilang balay? Usa ka bag-ong publikasyon nga giandam sa National Catechistic Bureau of the Italian Bishops’ Conference nag-ingon: “Ang pagdumili nga makigsulti, nga maluloton apan sa malig-on, niining kasoha maoy dili kakulang sa kaluoy.”

Dili tanang Katoliko ang miuyon, ingon sa gipakita sa sulat nga gipadala sa mantalaang Gazzetta del Mezzogiorno gikan sa usa ka tawo nga nagpuyo sa Foggia, Italya:

“Dili ako usa sa mga Saksi ni Jehova. Ako Katoliko. Apan ako natingala sa pipila ka balaod nga gipatuman sa iglesya diha sa mga membro, nga nagbaod kanamo nga magtaod ug mga karatula diha sa among mga pultahan nga nag-abog sa mga Saksi ni Jehova. Kining mga tawhana, kon hunahunaon, nagdala lamang sa Pulong sa Diyos, ug ilang gitabangan ang uban nga makabaton ug mas lalom nga kahibalo sa Bibliya. Ako napahinumdoman sa panahon sa dihang ang Italya gihampak sa kolera ug kita gihatagan ug tambag kon unsaon paglikay nga mataptan.

“Sa akong hunahuna, kini nagpakita nga ang iglesya nagdiktar sa iyang kaugalingong mga lagda nga wala magkonsiderar sa mga kagustohan sa mga membro. Apan sa pipila na ka tuig karon, akong nakita nga bisan ang mga Katoliko nagapamalaybalay, nga nagaduaw usab sa kabalayan sa mga Saksi ni Jehova; ug ilang gipadayon sila, nga nakigsulti kanila, nga wala magsalikway kang bisan kinsa.”

Ang mga Saksi ni Jehova dili magpugos sa mga tawo nga dawaton ang ilang mensahe. Hinunoa, sila naningkamot sa pagpakig-ambit sa uban sa paglaom nga gitanyag sa Pulong sa Diyos nga nakaplagan nila mismo nga makapahupay niining masamok nga panahon. Pinaagi sa pagpamalaybalay, maingon man sa pagpakigsulti niadtong ilang mahibalag sa karsada, ang mga Saksi ni Jehova nakig-ambit sa maayong balita sa Gingharian sa Diyos niadtong andam nga mamati.​—Mateo 24:​14; Buhat 5:​42; 17:17.