Gipaneguro ang Kasegurohan sa Pagkaon sa Kalibotan—Pinaagi sa Unsa?

“ANG atong labing maayong mga paningkamot dili pa tingali igo sa paghupot sa kasegurohan sa pagkaon nga atong nahibaloan sa labing dakong bahin niining sigloha,” nag-ingon si Lester Brown, presidente sa Worldwatch Institute sa Washington, D.C. Sumala sa magasing New Scientist, sa pagsugod sa 1995, ang reserbang lugas sa kalibotan mius-os sa kinaubsan nga 255 ka milyong tonilada​—igo lamang sa pagpakaon sa kalibotan sulod sa 48 ka adlaw. Sa miaging tuig sa dihang ang reserba nakapakaon sa kalibotan sulod sa 60 ka adlaw o menos pa niana, ang suplay nakabawi. Apan karon ang Worldwatch dili segurado sa katakos sa yuta sa pagbawi sa nawala niini.

Human sa tulo ka tuig nga menos ang ani ug uban sa dugang nagakaugmad nga mga nasod nga nagagamit sa lugas sa pagpakaon sa mga binuhi, nagkamenos ang lugas nga mabatonan alang sa mga kabos nga nagkinahanglan niini ingong pangunang pagkaon. Ang New Scientist nagpasidaan nga kon ang kahimtang dili dayon tagdon, ang usa ka bilyong tawo nga migugol sa labing menos 70 porsiyento sa ilang kita diha sa pagkaon mahimong magsugod sa pagkagutom.

Ang Bibliya nagtagna nga ang mga molupyo sa yuta sa atong panahon makasinati ug “mga kakulag pagkaon.” (Lucas 21:11) Bisan pa niana ang Diyos nagpakabana sa problema. Sa pagkatinuod, ang iyang bug-os nga kabalaka sa kahimtang sa tawo ipakita sa dihang ang iyang Gingharian ang magkontrolar sa mga kalihokan sa yuta. Nianang panahona “ang yuta mismo magpatungha sa abot niini.” “Aduna unyay daghang lugas sa yuta; sa ibabaw sa kabukiran adunay pag-awas.” (Salmo 67:6; 72:16) Nan kining matagnaong mga pulong labot sa Maglalalang matuman: “Imong gipunting ang imong pagtagad sa yuta, aron ikaw maghatag niini sa kadagaya . . . Ang kawalogan mismo natabonan sa lugas.”​—Salmo 65:​9, 13.

Nakadani ba kanimo kanang kahibulongang saad? Buot ka bang mahibalo kon sa unsang paagi ikaw mahimong bahin niana? Nan hangyoa ang mga Saksi ni Jehova nga sultihan ka ug dugang bahin niining gisaad nga Paraiso sa sunod higayon nga sila moduaw sa imong pultahan.

Kon buot nimong adunay moduaw sa imong balay sa pagdumala ug libreng pagtuon sa Bibliya uban kanimo, palihog pagsulat sa Watch Tower, P.O. Box 2044, 1060 Manila, o sa nahiangay nga direksiyon nga gilista sa panid 2.

[Picture Credit Line sa panid 32]

Pasukip: Pictorial Archive (Near Eastern History) Est.