Pagsumpo sa Bakak nga mga Akusasyon sa Pransiya
ANG mga Saksi ni Jehova sa Pransiya di pa dugay nahimong tumong sa nagpungasing bakak nga mga akusasyon. Nagpahimulos sa ngilngig nga mga hitabo nga naglangkit sa relihiyosong mga kulto sa Uropa ug Hapon, ang media nagpakaylap ug tinuis nga impormasyon bahin sa mga Saksi. Sayop silang gihulagway ingong usa sa labing dako ug labing kuyaw nga mga kulto.
Sa paningkamot nga tul-iron ang mga butang, ang mga Saksi ni Jehova nagpatik ug usa ka tract nga nagtubag sa mga pangutana sama niini: Kinsa ang mga Saksi ni Jehova? Sila ba mga Kristohanon? Modawat ba silag medikal nga pag-atiman? Nganong nagahimo man sila sa pultahan-sa-pultahan nga buluhaton? Sa unsang paagi ang ilang buluhaton gitagan-ag panalapi? Giunsa sa mga Saksi ni Jehova paghatag ug kaayohan ang katilingban?
Ang impormatibong tract sa sinultihang Pranses nag-ulohan ug Mga Saksi ni Jehova—Kon Unsay Angay Nimong Mahibaloan. Aron mabinlan ug tract ang daghang tawo kutob sa maarangan, ang kampanya giorganisar. Gikan sa Mayo 13 ngadto sa Hunyo 9, 1996, kapin sa siyam ka milyong kopya ang naapod-apod.
Kini nga tract nakapadayeg sa daghan, lakip na sa mga publikong opisyal. “Ang pagsaway nga gipatumong nganha sa mga Saksi ni Jehova nakapalagot kanako,” misulat ang usa ka rehiyonal nga konsehal human mabasa ang tract. “Makadaghan na akong nakadayeg sa kamahinatagon ug di-hinakog nga kinaiyahan sa inyong buluhaton.” Sa pagsanong sa tract, usa ka membro sa Uropanhong Parliamento misulat: “Ang mayoriya sa katawhan nasayod pag-ayo kon unsaon pag-ila sa kalainan tali sa grupo sa mga Kristohanon nga niana ikaw usa ka bahin ug sa mga kulto.”
Sa Brittany ang usa ka Saksi nagtanyag sa tract ngadto sa usa ka pari, kinsa midawat dayon niana. “Gidayeg ko kamo tungod sa inyong ginahimo,” ang pari miingon. Dayon siya midugang: “Gidasig ko ang akong mga parokyano nga padayonon kamo sa ilang mga balay ug dalitan kamo ug usa ka tasang kape. Mahimo pa ninyong sultihan kadtong inyong ikasugat nga nakaanhi kamo sa akong balay. Buot kong sultihan usab kamo nga giapresyar ko ang pagbasa sa inyong mga publikasyon.”
Human madawat ang tract, usa ka Protestanteng lalaki sa Alsace misulat sa Watch Tower Society nga naghangyog pagtuon sa Bibliya. “Human kawad-i sa tanang pagsalig sa akong simbahan,” siya misulat, “nagalantaw ako sa unahan sa usa ka bag-ong pagsugod sa espirituwal nga paagi.” Luyo sa bakak nga mga sumbong nga usahay gipatumong batok kanila, ang mga Saksi ni Jehova sa Pransiya—ang tinuod, sa tanang bahin sa kalibotan—padayong nagatabang sa katawhan nga makadangat sa tukmang kahibalo sa mga katuyoan sa Diyos, ingon sa gipakita sa Bibliya.—2 Timoteo 3:16, 17.