Pagtuo sa Diyos-Nagkinahanglan ba kini ug milagro?
SI Albert diha sa iyang pangedarong 20 sa dihang siya nagsugod sa pagpangita sa Diyos. Gisusi niya ang daghang relihiyon apan nagpabiling wala matagbaw. Sa nagbasag mga bahin sa Bibliya, nahibaloan niya ang pagpakiglabot sa Diyos sa maong mga indibiduwal sama kang Noe, Abraham, Sara, ug Moises. Si Albert nakakaplag sa iyang kaugalingon nga nasuod sa Diyos sa Bibliya. Apan, siya ba makatino nga tinuod gayod nga naglungtad ang Diyos?
Usa ka gabii miadto si Albert sa usa ka mingaw nga dapit diin didto siya nag-ampo, “Palihog Diyos, hatagi ako ug ilhanan—bisan unsa nga magpamatuod nga ikaw naglungtad.” Si Albert nagpaabot ug nagpaabot. Siya nahinumdom nga sa dihang walay nahitabo, ang iyang pagdahom “misangpot sa pagkalugda, kahaw-ang, kasuko.”
Sama kang Albert, daghan ang mibati nga kawang ang pagpangita nila sa Diyos. Sila tingali naglibog sa mga sermon sa mga klerigo o nalugda sa pagkakomersiyante sa mga ebanghelisador sa telebisyon. Nahibalo sa pagkasalingkapaw nga dayag taliwala sa daghan sa gitawag kono nga mga Kristohanon, ang uban wala makaseguro kon unsay ilang tuohan. Apan, si Haring David sa karaang Israel nagpasalig sa iyang anak nga si Solomon: “Kon ikaw mangita [sa Diyos], iyang tugotan ang iyang kaugalingon nga makaplagan nimo.”—1 Cronicas 28:9.
Nan, sa unsang paagi magpadayag ang Diyos sa iyang kaugalingon? Angay ka bang magdahom ug ilhanan—usa ka labaw-tawhanong kasinatian nga magpamatuod kanimo nga ang Diyos naglungtad? Sumala sa usa ka bag-ong surbi nga gitaho sa magasing Time, kapin sa dos tersiya sa mga Amerikano ang nagtuo sa mga milagro. Ang artikulo usab nag-ingon nga “ang kusog nga nagdakong mga iglesya sa Amerika mao ang mga kongregasyon nga Charismatic ug Pentecostal kansang pagsimba gipasukad sa ‘mga ilhanan ug mga katingalahan.’”
Nagkinahanglan ba gayod ug “mga ilhanan ug mga katingalahan” ang pagtuo sa Diyos? Siya migamit ug mga milagro sa nangaging panahon. Sa pag-ilustrar: Si Saulo sa Tarso, nga naglutos sa mga sumusunod sa Anak sa Diyos, si Jesu-Kristo, may dili-ordinaryong kasinatian diha sa dalan gikan sa Jerusalem paingon sa Damasco. Kining milagrosong engkuwentro uban sa nabanhaw nga si Jesus miagak sa pagkakombertir ni Saulo. (Buhat 9:1-22) Busa ang maglulutos niadto nahimong si apostol Pablo—usa sa pangunang mga maglalaban sa Kristiyanidad!
Apan ang mga milagro ba kanunayng nagpukaw sa ingon nianang paborableng pagsanong? Ang tinuod ba nga pagtuo sa Diyos nagadepende diha sa pipila ka milagrosong kasinatian sa usa?
[Hulagway sa panid 3]
Ang Anak sa Diyos milagrosong nakigsulti kang Saulo sa Tarso. Angay ka bang magdahom ug milagro?