Ang Kamatuoran Bahin sa Impiyerno
USA ka taho sa komisyonado sa doktrina sa Church of England nag-ingon nga ang impiyerno dili man diay nagdilaab nga hudno; apan, maoy di-tinong dapit sa pagkawala-maglungtad. “Adunay daghang katarongan alang niini nga kausaban,” nagsaysay ang taho. “Apan taliwala niini mao ang moral nga protesta gikan sa sulod ug gawas sa Kristohanong pagtuo batok sa relihiyon sa kahadlok, ug ang nagtubong pagbati nga ang pag-isip sa usa ka Diyos nga nagbanlod sa minilyon ngadto sa walay kataposang kasakit maoy sukwahi diha sa pagpadayag sa gugma sa Diyos kang Kristo.”
Kining pagsupak sa naandang pagtuo sa impiyerno dili lang kay sa Church of England. Ang katawhan gikan sa nagkalainlaing denominasyon gilisdan sa pagsimba sa usa ka mapanimaslong Diyos kinsa nagasunog sa mga makasasala. “Ang katawhan buot sa usa ka Diyos nga mainiton ug mabination,” matod pa ni Jackson Carroll, propesor sa relihiyon ug sosyedad sa Divinity School sa Duke University. “Sukwahi kini sa kultura karong adlawa ang paghisgot sa sala ug pagkasad-an.”
Dugay nang nagtuo ang mga Saksi ni Jehova nga ang impiyerno, segun sa gitudlo sa Bibliya, mao lamay komon nga lubnganan sa patay nga katawhan—dili dapit sa nagkalayong pagsakit. Gibarogan nila kining hunahunaa, dili tungod kay kini ilado, apan gumikan sa ginaingon sa Bibliya: “Maylabot sa patay, wala silay panimuot sa bisan unsa pa . . . Walay buluhaton ni laraw ni kahibalo ni kaalam sa Sheol [“impiyerno,” Katolikong Douay Version].”—Ecclesiastes 9:5, 10.
Uban niining tin-awng pagsabot bahin sa kahimtang sa patay, si Charles Taze Russell, unang presidente sa Watch Tower Society, misulat balik pa niadtong 1896: “Among nakaplagan [sa Bibliya] nga walay lugar nga sama nianang walay kataposang pagsakit nga sayop nga gitudlo diha sa mga kredo ug sa mga alawiton, ug sa daghang pulpito. Apan among nakaplagan ang usa ka ‘impiyerno,’ sheol, hades, nga niana ang tanan natong kaliwat gitunglo gumikan sa sala ni Adan, ug gikan niana ang tanan gilukat pinaagi sa kamatayon sa atong Ginoo; ug kana nga ‘impiyerno’ mao ang lubnganan—ang kahimtang diha sa kamatayon.”
Busa kapin na sa usa ka siglo, ang mga Saksi ni Jehova nagtudlo sa Biblikanhong kamatuoran bahin sa impiyerno.
[Hulagway sa panid 32]
Charles T. Russell