Laing Kadaogan sa mga Saksi ni Jehova sa

Gresya

NIADTONG Oktubre 6, 1995, usa ka asunto nga naglangkit sa duha ka bug-os-panahong mga ministro sa mga Saksi ni Jehova gihusay sa tulo-ka-membro nga Mahistradong Korte sa Atenas. Ang sumbong mao ang proselitismo, ug ang demanda gipasaka sa usa ka polis human nga ang mga Saksi miduaw sa iyang balay.

Ang mga pangutana nga gisukna sa nagadumalang huwes nagpakita nga interesado siya kaayo sa buluhaton sa mga Saksi ni Jehova. Pananglitan, siya misukna: “Unsa na ka dugay nga gihimo ninyo kining buluhatona? Unsay pagtagad sa mga tawo kaninyo latas sa katuigan? Unsa may pagsanong sa inyong buluhaton? Unsa may inyong ginasulti sa mga tawo sa ilang mga ganghaan?” Ang tanang presente sa hukmanan naminaw pag-ayo sa maayong pagpamatuod nga gihatag.

Sa katingala sa mga Saksi, bisan ang piskal misulti pabor kanila. “Ang mga Saksi ni Jehova adunay konstitusyonal nga katungod dili lamang sa pagtuo ug pagsimba sa ilang Diyos,” siya miingon sa iyang paniklop nga pakigpulong, “apan usab sa pagpakaylap sa ilang pagtuo diha sa mga ganghaan, sa publikong mga parke, ug sa kadalanan, bisan sa pag-apod-apod sa ilang literatura nga walay bayad kon buot nila.” Gipunting sa piskal ang lainlaing desisyon sa pag-absuwelto nga gipakanaog sa mga korte ug sa Konsilyo sa Estado. Gipunting usab niya ang kaso nga Kokkinakis v. Greece, nga gihukmang pabor sa mga Saksi ni Jehova pinaagi sa Korte sa Tawhanong Katungod sa Uropa.a “Palihog matikdi,” mipahimangno ang piskal, “nga ang Gresya nakabayad pa ngani ug multa niining kasoha. Busa kinahanglang magbantay kita pag-ayo kon pahukmon sa maong mga kaso. Sa pagkatinuod, kining mga kasoha dili gayod unta angay dad-on sa korte.”

Human sa pakigpulong sa piskal, halos wala nay ikasulti pa ang abogado sa mga Saksi. Bisan pa niana, gipahimuslan niya ang kahigayonan aron ipasiugda nga ang balaod sa proselitismo dili konstitusyonal ug kini nagpakaulaw sa Gresya sa internasyonal nga sukod.

Ang nagadumalang huwes mipasiplat lamang sa lain pang duha ka huwes, ug ang igsoong lalaki ug babaye duyog nga giabsuwelto. Ang husay, nga mikabat sa usa ka oras ug napulo ka minutos, maoy kadaogan sa ngalan ni Jehova ug sa iyang katawhan.

Mao kini ang ikaupat nga pagkaabsuwelto maylabot sa mga kasong proselitismo tapos sa kaso nga Kokkinakis nga gihusay sa Korte sa Tawhanong Katungod sa Uropa. Ang mga Saksi ni Jehova sa Gresya nagmaya nga ang mga suliran maylabot sa ilang pagsangyaw karon halos nahanaw na ug posible na ang pagpadayon sa buluhaton nga walay babag.

[Mga footnote]