Mga Magmamantala sa Gingharian Nagtaho

Pag-abot sa Tanang Matang sa Tawo Pinaagi sa Kamatuoran

SI APOSTOL Pablo maoy masibotong magmamantala sa Gingharian sa Diyos. Wala niya tugoti ang pagsupak nga mobalda sa iyang komisyon nga pagwali “sa maayong balita.” (1 Corinto 9:​16; Buhat 13:​50-52) Giawhag ni Pablo ang uban nga mosunod sa iyang panig-ingnan.​—1 Corinto 11:1.

Ang mga Saksi ni Jehova ilado sa tibuok kalibotan tungod sa ilang hugot nga mga paningkamot sa pagsangyaw. Sa pagkatinuod, sila nakigsulti sa uban sa “paborableng panahon” ug sa “masamokong panahon” aron sa pagtuman sa ilang gisugo-sa-Diyos nga buluhaton nga ‘paghimog mga tinun-an.’ (2 Timoteo 4:​2; Mateo 28:​19, 20) Bisan sa mga nasod diin ilang nasinati ang pagsupak, ang mga matinud-anog-kasingkasing napaabtan sa hinungdanon-sa-tanan nga mensahe mahitungod sa Gingharian sa Diyos, ingon sa giilustrar sa mosunod nga mga kasinatian.

Sa usa ka isla sa kasadpang Pasipiko diin ang buluhaton sa mga Saksi ni Jehova gidili, usa ka 12-anyos nga batan-ong lalaki nakamatikod nga gilibotan siya sa daotang mga kauban sa eskuylahan. Daghan sa iyang mga klasmet regular nga nagtabako, nagbasa ug pornograpikong literatura, nanghasi sa mga magtutudlo, ug nakig-away. Ang kahimtang migrabe pag-ayo nga gihangyo sa batan-on ang iyang amahan kon mahimo ba siyang mobalhin sa laing eskuylahan. Ang amahan, hinunoa, nangatarongan uban sa iyang anak lalaki batok sa maong ideya, sanglit iyang gibati nga ang panggawi sa mga estudyante sa ubang mga eskuylahan pareho ra. Bisan pa niana, unsaon niya pagtabang ang iyang anak?

Ang amahan nahinumdom nga adunay libro alang sa mga batan-on diha sa balay. Kana maoy regalo gikan sa usa ka paryente nga usa sa mga Saksi ni Jehova. Busa iyang gipangita ang libro, ug sa pagkakita niana, iya kanang gihatag sa iyang anak. Kana nag-ulohang Mga Pangutanang Gisukna sa mga Batan-on​—Mga Tubag nga Mosaler.a Nadiskobrehan sa batan-on nga ilabinang makatabang ang kapitulong “Sa Unsang Paagi Makasukol Ako sa Pagpit-os sa Isigkaingon?” Dili lang kay kana nagtudlo kaniya sa kahinungdanon sa paghupot ug pagtahod sa kaugalingon kondili nagtudlo usab kana kaniya kon sa unsang paagi moingong dili nga mataktikanhon sa dihang ang uban mosulay sa pagpugos kaniya nga mosubay sa dili-maalamong dalan. Pinaagi sa pagpadapat sa Kasulatanhong mga prinsipyo nga makaplagan diha sa libro, ang batan-on nakakat-on kon unsaon pagsukol nga malamposon sa pagpit-os sa isigkaingon.

Kay nakakita niini ug sa ubang positibong mga kausaban diha sa iyang anak, ang amahan mihukom sa pagbasa sa libro. Nakadayeg sa praktikal nga tambag nga makaplagan diha sa libro, ang amahan mihangyo sa mga Saksi ni Jehova ug usa ka pagtuon sa Bibliya. Sa ulahi, ang ubang mga membro sa iyang pamilya miduyog kaniya sa pagtuon. Ang resulta? Ang batan-on, iyang manghod nga lalaki, iyang amahan, ug duha sa mga apohan sa batan-on sa pagkakaron maoy mga Saksi ni Jehova.

Sa samang nasod, duha ka Saksi ni Jehova ang gibilanggo tungod sa ilang hugot nga pagsunod sa mga prinsipyo sa Bibliya. Bisan pa niana, wala nila tugoti ang ilang kahimtang nga mopugong kanila sa pagsulti nga maisogon mahitungod sa Gingharian sa Diyos. Ilang giduol ang usa ka opisyal sa bilanggoan ug nakadawat ug pagtugot nga saulogon ang Panihapon sa Ginoo didto. Pagkadako sa ilang kalipay sa dihang 14 ka binilanggo ang mipahayag sa ilang interes sa Bibliya ug miduyog sa mga Saksi niining hinungdanong okasyon! Human sila mapagawas, ang pipila kanila mipadayon sa pagtuon sa Bibliya ug pagpakig-uban sa mga Saksi ni Jehova.

Sa kapin sa 25 ka nasod, ang mga Saksi ni Jehova nag-antos ingong resulta sa mga pagdili o sa nagkalainlaing mga matang sa pagsupak ug paglutos. Apan, sama sa mga apostol, sila nagpadayong “walay hunong sa pagpanudlo ug sa pagpahayag sa maayong balita bahin sa Kristo, si Jesus.”​—Buhat 5:42.

[Mga footnote]