Balaan Bang Kapadayagan ang Tanan?
ANG espiritu sa Diyos, nga maoy nagdasig sa Balaang Bibliya, mao ba usab ang responsable sa ubang mga libro nga giisip sa pipila nga balaan? (2 Timoteo 3:16) Kining pangutanaha gibangon sa usa ka Italyanhong mantalaang Heswita (La Civiltà Cattolica), nga gipatik “ubos sa pagdumala sa Secretariat of State [sa Batikano]” ug busa giisip nga awtoritatibo sa Katolikong mga kaanib.
“Ang Diyos, pinaagi sa paglihok sa Balaang Espiritu, nagsabwag sa binhi sa Pulong bisan diha sa pipila ka balaang mga libro sa dili-Hudiyohanon ug dili-Kristohanong tradisyon,” matod pa sa Heswitang mantalaan. Alang sa mga Heswita, ang “balaang” mga libro, sama sa Zoroastrian Avesta o ang Four Books ni Confucius, gisulat “nga may pipila ka partikular nga impluwensiya sa Balaang Espiritu, ug busa, sa pipila ka sukod nagbaton kini ug ‘balaang pagpadayag.’”
Bisan pa niana, ang artikulo nagpatin-aw. “Dili tanang kaundan sa maong balaang mga libro maoy pulong sa Diyos,” kini nag-ingon, nga nagdugang nga kadtong nanulat niining mga libroha mahimong “nakasinati sa impluwensiya sa palibot nga nagtuo ug daghang diyos o sa pilosopikanhong palibot” nga niana sila nagpuyo ug naglihok. Sumala pa kang Marco Politi, koresponsal sa mga kalihokan sa Batikano alang sa Italyanhong mantalaang La Repubblica, kini nga baroganan “nagbukas sa kanhi gituohang imposibleng mga relasyon tali sa Iglesya Katolika ug sa dagkong makasaysayanhong mga relihiyon,” nga nagpasig-uli sa espiritu sa nagkadaiyang panagtapo sa pagtuo sa mga tigom sa pag-ampo sama nianang sa Assisi niadtong 1986, nga masibotong gipalambo ni Juan Paulo II.
Si Jehova dili usa ka Diyos sa kasamok ug kalibog. (1 Corinto 14:33) Busa kita dili tukmang makahinapos nga ang iyang balaang espiritu, o aktibong puwersa, magdasig bisan sa usa ka bahin sa bisan unsang mga libro nga sa bug-os dili uyon sa iyang Pulong, ang Bibliya. Inay idasig ang ekumenikanhong pamaagi tali sa lainlaing “relihiyosong mga tradisyon,” ang Kristohanong apostol Pablo misulat nga aduna lamay “usa ka paglaom . . . , usa ka Ginoo, usa ka pagtuo, usa ka bawtismo.”—Efeso 4:4, 5.
Kanang “usa ka paglaom” nahisalig sa pagbaton ug pagtuo kang Jesu-Kristo. Ang Bibliya tukmang nag-ingon: “Walay kaluwasan diha kang bisan kinsa pang lain, kay walay laing ngalan ilalom sa langit nga gikahatag taliwala sa mga tawo nga pinaagi niini kita gayod maluwas.” (Buhat 4:12) Walay laing “balaang libro” ang nagpresentar kang Jesus ingon nga pangunang pigura sa katumanan sa mga katuyoan sa Diyos. Kon dawaton lamang nato ang Bibliya ingon nga Pulong sa Diyos kini makatudlo kanato bahin sa mahigugmaong tagana ni Jehova nga Diyos alang sa kaluwasan.—Juan 17:3; 1 Tesalonica 2:13.