Kinsay Mabasol sa Gubat?

ANG Diyos ba maoy mabasol alang sa mga gubat nga gibugno sa katawhan? “Dili, dili gustog gubat ang Diyos.” Kanay tubag ni Martin Niemöller, usa ka iladong Alemang Protestanteng klerigo, niining pangutanaha wala madugay pagkatapos sa Gubat sa Kalibotan II. Ang iyang mga komento gipatik niadtong 1946 sa usa ka librong gitawag ug Ach Gott vom Himmel sieh darein​—Sechs Predigten (Oh Diyos, Tan-aw Gikan sa Langit​—Unom ka Wali).a Ang libro nagpahayag:

“Si bisan kinsa nga buot magbasol sa Diyos alang sa [mga gubat] wala masayod, ni buot masayod, sa Pulong sa Diyos. Hinuon, lahi na nga butang kon ang mga Kristohanon duna kaha o wala ing sala tungod sa way-hunong nga mga gubat. Ug dili kita sayong makaikyas niining pangutanaha. . . . Tukmang mahinumdoman usab nga ang Kristohanong mga simbahan, sa tanang kapanahonan, masubsob nga nagbendisyon sa mga gubat, sa mga tropa, ug sa mga hinagiban ug nga nag-ampo sila sa dili gayod Kristohanong paagi alang sa pagkalaglag sa ilang mga kaaway sa gubat. Kining tanan atong sala ug sala sa atong mga katigulangan, apan dili gayod mabasol ang Diyos. Ug kitang mga Kristohanon karon ang angayng maulaw atubangan sa giingong sekta nga sama sa Sinserong mga Estudyante sa Bibliya [mga Saksi ni Jehova], kinsa sa ginatos ug linibo nabalhog sa mga kampo konsentrasyon ug [gani] namatay tungod kay midumili sa serbisyo militar ug midumili sa pagpatay sa mga tawo.”

Karong adlawa, mga 50 ka tuig human sa Gubat sa Kalibotan II, ang mga pulong ni Niemöller angay nga palandongon sa mahigugmaon-ug-kalinaw nga mga tawo. Dili, ang Diyos dili mabasol alang sa pag-ulag dugo sa mga nasod! Sa tinuoray, pinaagi sa iyang matuod nga mga magsisimba, kinsa wala mag-apil-apil sa mga away sa kalibotan, ang Diyos nagpahayag sa haduol nga kataposan sa tanang gubat.​—Salmo 46:​9; Juan 17:16.

[Mga footnote]

[Picture Credit Line sa panid 32]

Letrato sa USAF