“Busa Hain man ang Inyong Simbahan?”

ANG mga Saksi ni Jehova sa Mozambique kanunayng gisukna niining pangutanaha. Sa prangka, lisod kaayong tubagon ning pangutanaha kaniadto. Kini tungod kay ang mga Saksi ni Jehova wala makapahimulos ug legal nga pag-ila niining nasora hangtod sa 1991. Busa, dili posible and pagbatog ilado ug establisadong mga dapit sa pagsimba.

Bisan pa niana, kanang kahimtanga nausab niadtong Pebrero 19, 1994. Nianang mainit, masanag nga adlaw, ang unang duha ka Kingdom Hall nga sukad natukod sa Mozambique gidedikar. May total nga 602 ang mitambong sa dedikasyon nianang maanindot nga mga tigomanan sa dunggoanang siyudad sa Beira, halos tungatunga ubay sa baybayon sa Mozambique. Mag-alagad kini sa mga panginahanglan sa tulo ka kongregasyon nianang siyudara.

Ang tibuok proyekto, gikan sa pagpahiluna sa pundasyon ngadto sa pagkatapos sa mga tinukod, mikabat ug usa ka tuig ug duha ka bulang paghago. Kasagarang 30 o kapin pang boluntaryo gikan sa kasikbit nga Zimbabwe ang miabot ug mitrabaho abaga sa abaga uban sa lokal nga mga Saksi. Sanglit dili tanan kanila mapasaka sa puy-anan sa misyonaryo sa Beira, nga nagsilbing sentro sa mga kalihokan, ang pipila nagkampo palibot sa puy-anan panahon sa mga hinapos sa semana ug usahay sulod sa mga semana sa usa ka higayon.

Ang dapit sa Kingdom Hall sa mga Kongregasyong Massamba ug Munhava nahimutang sa pangunang dalan sa Beira. “Sa puliking adlaw, dihang paspas ang trabaho ug ang pag-uswag makita pag-ayo,” nakamatikod ang usa ka misyonaryo, “nakita namong dihay hapit nang maaksidente sa dihang ang mga drayber nga manglabay motan-aw sa Kingdom Hall, nga halos nalimot na sa ilang pagmaneho.” Daghan ang mihunong aron sa paglantaw sa trabaho, ug nakadayeg sila ilabina sa presensiya sa lainlaing mga rasa nga nagtrabahong tingob.

Dakong pagplano ug pag-organisar ang nalangkit. Dili sama sa ubang mga proyekto niining bahina sa kalibotan, diin nihit ang materyales ug mga kahinguhaan, ang pagtukod sa Kingdom Hall wala gayod mahunong gumikan sa kakulang ug materyales. Sa usa ka okasyon, 800 ka sako sa semento ang gikinahanglan, ug ang bugtong pabrika nga makatagana niana walay gikinahanglang sako nga kasudlan sa semento. Ang mga igsoon mikontak sa sangang buhatan sa Watch Tower Society sa kaulohan, sa Maputo; gieroplano ang mga sako, gidala ngadto sa pabrika sa semento, ug gisudlan. Ang trabaho nagpadayong walay hunong.

Sa laing okasyon, dihang ang mga katsaw sa atop ginataod, ang mga trabahante nahutdan ug aserong mga sagbayan. Gumikan sa tumang kanihit, ang aserong gamiton sa proyekto gikuha pa gikan sa 600 kilometros! Usa ka tawo nga nagtan-aw giduol sa usa ka trabahante ug gisukna kon nasayod ba siya kon asa sila makakaplag ug asero nga ikapahuman sa trabaho. Ang tawo mitubag: “Nagbarog na ako dinhig kapin sa usa ka oras, ug dili kini kay sulagma lamang. Nakadayeg gayod ako sa trabaho nga inyong gihimo ug sa espiritu niining proyektoha. Aduna akoy asero nga inyong gikinahanglan, ug kalipay nakong itanyag kadto kaninyo ingong gasa.” Nahimo kadtong usa ka tukma sa panahong tagana.

Daghang nanan-aw natingala kon unsang dakong kompaniyaha sa konstruksiyon ang nagpaluyo sa proyekto. Ang mga trabahante, siyempre, nalipay sa pagsulti kanilang kini maoy mga Saksi ni Jehova nga nagboluntaryo sa ilang serbisyo. Unsa ilabina ang nakapatingala sa mga nanan-aw? “Nagkahiusa kamo,” matod pa sa usa. “Bisan lainlaig rasa, nagtrabaho kamong tingob ingong magsoon.” Ang resulta mao nga daghan ang miduol ug mihangyog mga pagtuon sa Bibliya. May epekto usab kini sa mga tigom. Ang aberids nga mga tumatambong sa tigom sa Kongregasyon sa Manga, pananglitan, midoble kay sa gidaghanon sa mga Saksi.

Ang bag-ong mga Kingdom Hall napamatud-ang dakong panalangin alang sa lokal nga mga Saksi. Kadaghanan kanhi nagtigom lamang sa primitibong mga dapit nga giatpan lamag kogon o pipila ka palid nga lata, sa likod sa balay, o sa gamayng lawak sa usa ka pribadong balay. Kasagaran silang mangahumod kon mag-ulan; sa gihapon sila matinumanong mitambong sa mga tigom. Sulod sa mga dekada ingon niini ang bugtong “mga Kingdom Hall” nga nailhan sa mga Saksi ni Jehova sa Mozambique. Si Igsoong Caetano Gabriel, ansiyano sa Kongregasyon sa Massamba, mipahayag: “Kami mapasalamaton sa among mga igsoon sa tibuok kalibotan kinsa miamot sa kalamposan niining proyektoha.” Usa ka batan-ong Saksi nahinumdom: “Niadtong didto kami sa Carico (“mga kampo sa pag-edukar pag-usab” diin ang mga Saksi ni Jehova gibilanggo sa duolag 12 anyos), kami kanunayng moingon, ‘Molahutay kitang matinumanon, ug si Jehova magaganti kanato.’ Ang bag-ong Kingdom Hall maoy ganti gikan kang Jehova.” Ang ilang mga pulong nagpahayag sa ilang tim-os nga pasalamat ug sa ilang determinasyon sa pagdayeg kang Jehova.

Daghang batan-on nga miambit sa konstruksiyon natukmod sa espiritu sa pagpayunir ug human niana misulod sa regular payunir nga ministeryo. Ang batan-ong si Isabel, usa ka regular payunir sa Kongregasyon sa Manga, mikomento samtang siya nagtan-aw sa tuman ka hinlong Kingdom Hall usa ka adlaw una pa ang dedikasyon niini: “Alang kanako kini mao ang labing nindot nga dapit sa tibuok siyudad sa Beira. Dako kaayo ang akong kalipay nga maania dinhi.” Si Adão Costa, usa ka misyonaryo, misaysay nga matinabangon kaayo ang lokal nga mga awtoridad sa pagtugot ug linaing mga pamaagi sa pag-importar sanglit sila nasayod sa pagkamatinud-anon sa mga Saksi. Dayon siya midugang: “Bisan tuod kami gikapoy pag-ayo, makapalipay ang pagkakita sa mga bunga niining tanang paghago alang sa dungog ug himaya ni Jehova.”

Karon, bisan kanus-a nga usa ka mahigalaong molupyo sa siyudad sa Beira mangutana, “Busa hain man ang inyong simbahan?” ang mga Saksi motultol kaniya ngadto sa usa sa duha ka bag-ong mga Kingdom Hall ug motubag sa mga pulong sama sa, “Anaa sa International Road, Avenida Acordo de Lusaka, atubangan lamang sa Fourth Squadron Police Station.” Dayon, korehiag gamay, “Apan di na simbahan. Kana maoy Kingdom Hall!”

[Mapa/Mga hulagway sa panid 20]

(Alang sa aktuwal nga pagkahan-ay, tan-awa ang publikasyon)

APRIKA

MOZAMBIQUE

Beira

Maputo

[Credit Line]

Mapa: Mountain High Maps® Copyright © 1995 Digital Wisdom, Inc.