‘Sila Interesado sa Pagtabang sa Uban’
MAO kana ang giingon sa usa ka polis sa New York City bahin sa mga Saksi ni Jehova. Siya nakigsulti kang Kathleen, usa sa bug-os panahong mga boluntaryo nga nag-alagad sa punoang mga buhatan sa mga Saksi ni Jehova sa Brooklyn, New York.
Sa iyang tingpaniudto, sa usa ka mainit ug sanag nga adlaw sa tinghunlak, si Kathleen naglingkod sa usa ka lingkoranan diha sa duol nga Promenade. Siya namati sa usa ka audiocassette player nga adunay mga headphone. Sa tugpahanan sa helikopter tabok sa East River, ang mga pagpangandam gihimo alang sa pagpauli sa papa, nga miduaw sa siyudad. Higpit ang seguridad bisan asa, ug daghang polis ang nagronda sa Promenade. Usa kanila miduol kang Kathleen ug nangutana kon unsay iyang gibuhat. Si Kathleen mitubag: “Namati ko ug teyp nga Ruso ug pinulongan. Abi god nimo, ako usa sa mga Saksi ni Jehova, ug buot ko nga makakat-on ug Ruso aron makapaambit sa maayong balita sa Gingharian sa Diyos uban sa mga tawong nagasultig-Ruso nga ania nagpuyo sa siyudad.”
Ang polis mitubag nga nagdako ang iyang pagdayeg sa mga Saksi ni Jehova sa panahon sa iyang ulahing 15 ka tuig ingong polis nga tigronda sa New York City. Siya miingon: “Giisip ko ang mga Saksi ni Jehova ingong organisadong relihiyon kansang mga membro tim-os nga interesado sa pagtabang sa uban diha sa komunidad.”
Ang mga Saksi ni Jehova nailhan sa tibuok-yuta sa pultahan-ug-pultahang buluhatong pagsangyaw nga ilang ginahimo. (Buhat 20:20) Samtang gipunting nila ang Gingharian sa Diyos ingong ang bugtong sulbad sa mga problema nga nagahampak sa katawhan, sila nagatabang usab sa mga tawo sa pagpauswag sa ilang kalidad sa kinabuhi pinaagi sa pagdasig kanila sa pagpadapat sa mga prinsipyo sa Bibliya diha sa ilang inadlaw nga mga kinabuhi. Pananglitan, ang mga Saksi nag-awhag sa mga ginikanan sa pagtagana ug palibot sa panimalay nga paborable sa pagtuon. Sila nagtambag sa mga indibiduwal nga magmatinud-anon ug magmasinundanon-sa-balaod, nagdasig kanila sa pagbatog mga katakos ug mga hiyas nga makaplagang bililhon sa usa ka amo.
Oo, ang mga Saksi ni Jehova interesado kaayo sa pagtabang sa mga tawo diha sa komunidad sa pagpauswag sa ilang mga kinabuhi. Ikaw mainitong gidapit sa pagsanong sa mosunod nga tanyag.