Ang Katungod sa May-Kasayorang Pag-uyon Gipamatud-an Pag-usab
USA ka dili pa dugayng hukom nga gipakanaog sa Huwes sa Preliminary Investigations of the Court of Messina, sa Italya, nagpamatuod pag-usab nga ang medikal nga mga kagustohan sa usa ka hamtong nga pasyente kinahanglang sundon sa mga doktor. Ang mando gipakanaog sa usa ka kaso labot sa usa sa mga Saksi ni Jehova.
Sa Enero 1994, si Antonino Stellario Lentini, usa ka Saksi nga 64-anyos nga pasyenteng hemophiliac, gidali pagdala sa ospital sa Taormina, Messina. Gisultihan sa asawa ni Antonino, si Catena, ang mga kawani sa ospital nga ingong mga Saksi ni Jehova siya ug ang iyang bana dili mouyon sa pagtambal nga pag-abono ug dugo. (Buhat 15:20, 28, 29) Gitahod ang ilang mga kagustohan.
Ugaling, sa panahon sa paghatod ngadto sa laing sentro sa pag-atiman sa panglawas, ang respiratoryo ni Antonino wala na moobra ug miabot nga kritikal ang kahimtang. Wala magdugay human niana, siya namatay. Naguol pag-ayo si Catena, apan nakakaplag siyag dakong paghupay sa saad sa Bibliya bahin sa pagkabanhaw. (Buhat 24:15) Unya, sa iyang dakong kahibulong, ang mga mahistrado—tingali nadala sa sayop nga mga balita nga gipakaylap sa palaumagian sa balita—nag-akusar kaniya nga maoy hinungdan sa kamatayon sa iyang bana tungod kay midumili siya sa pagpaopera kaniya nga giisip sa mga doktor nga kinahanglanon.
Human sa kapin sa usa ka tuig, sa Hulyo 11, 1995, naabsuwelto si Catena, sanglit siya walay nahimong krimen. Sa pagkatinuod, ang testimonya sa mga espesyalista nagpasiugda nga, sa pagtimbangtimbang sa kahimtang sa pasyente, ang pag-opera dili gihapon magpulos.
Apan ang mga pulong sa huwes nagpaila sa pangunang isyu. Lisod dawaton, siya nag-ingon, ang ideya nga ang medikal nga kawani makapanghilabot sa dihang ang pagtambal gidumilian sa pasyente o sa mga tawong naghawas kaniya. Ang medikal nga deontolohikal nga kodigo sa Italya, siya midugang, “nagapanglantawng daan sa panginahanglan sa pagbatog may-kasayorang pag-uyon sa tawong nalangkit sa dili pa ang bisan unsang pagpanghilabot.” Busa, siya miingon nga si Catena “wala makasupak sa balaod sa pagsanta nga ipailalom ang iyang bana sa maong operasyon.”
Kini nga paghukom nagpamatuod pag-usab sa katungod sa usa ka hamtong sa pagdumili sa medikal nga pagtambal nga supak sa iyang mga kagustohan.