Ang Sugilambong Bahin sa Lunop Nagpanghimatuod sa Asoy sa Bibliya

ANG Lunop sa kalibotan sa mga adlaw ni Noe maoy usa ka makasaysayanhong hitabo. Ang mga bersiyon sa sugilanon madunggan sa binaba nga kasaysayan sa daghang lainlaing mga sibilisasyon sa tibuok kalibotan. Sa Aprikanong nasod sa Chad, ang tribong Moussaye nag-asoy sa Lunop nga sama niini:

‘Sa dugay na kaayong panahong nangagi, sa usa ka halayo nga dapit, may nagkinabuhi nga usa ka pamilya. Usa ka adlaw, ang inahan niining pamilyaha gustong mag-andam ug lamiang pagkaon alang sa iyang mga minahal. Busa gikuha niya ang iyang lusong ug alho aron maglubok ug dawa aron mahimong harina. Niadtong panahona ang panganod duol kaayo kay sa karon. Sa pagkatinuod, kon imong kab-oton sa imong kamot, imong mahikap kini. Munas ginhawa niyag lubok sa lugas, ug ang dawa nga iyang gilubok nahimo dayon nga harina. Apan samtang naglubok siya, sa kadanghag nasobrahan sa pag-isa sa babaye ang alho, ug nabuslotan niya ang panganod! Dihadiha, mibuhagay ang hilabihan ka daghang tubig diha sa yuta. Dili kadto ordinaryong ulan. Miabot ang ulan ug pito ka adlaw ug pito ka gabii hangtod ang tibuok yuta natabonan sa tubig. Samtang nangatagak ang ulan, ang panganod misugod sa pagsaka hangtod nakaabot kini sa nahimutangan niini karon​—hilabihang taasa. Pagkadakong katalagman alang sa katawhan! Sukad niadto, nawala kanato ang kahigayonan sa paghikap sa panganod sa atong mga kamot.’

Makaiikag, ang karaang mga sugilanon nga naghisgot bahin sa tibuok-yutang lunop madungog sa tibuok kalibotan. Ang lumad nga mga buhilaman sa kayutaan sa Amerika maingon man sa mga Aborigine sa Australia tanan adunay sugilanon bahin niana. Ang mga detalye tingali nagkalainlain, apan ang kadaghanan sa asoy may ideya nga ang yuta natabonan sa tubig ug pipila lamang ka tawo ang naluwas diha sa hinimog-tawo nga sakyanan. Ang kaylap nga paglungtad niini nga tema dugang nga nagpanghimatuod sa kamatuoran nga nahitabo gayod ang usa ka tibuok-kalibotan nga Lunop, sumala sa gitaho sa Bibliya.​—Genesis 7:11-20.