Mga Espesyalista Nagpalandong sa mga Kapilian sa Dugo

MGA 200 ka espesyalista gikan sa tibuok Tinipong Bansa ang nagtigom sa Cleveland, Ohio, sa Sabado, Oktubre 7, 1995, aron hisgotan ang ulohang nakahatag ug nagdakong kaikag sa natad sa medisina: ang walay-dugong medisina ug pag-opera.

Ang daghang malisod nga mga kahimtang gihisgotan. Pananglitan, komosta kon nasakit ug grabeng pagkakulag-dugo ang usa ka pasyente? Sa unsang paagi ang usa ka bata nga natawong ahat kaayo matambalan nga walay dugo? Molampos ba ang pag-opera sa kasingkasing nga walay mga pagdugang ug dugo? Makaiikag, ang pag-opera nga walay-dugo​—sagad nagagamit ug mga paagi nga motabang sa lawas sa pagpadaghan sa kaugalingong suplay sa dugo niini​—gibuhat na sa tanan niini nga mga kahimtang nga may maayong mga resulta.a

Nganong adunay panginahanglan ug mga kapilian sa mga pagdugang ug dugo? “Kami nasayod nga ang mga pagdugang ug dugo sagad mopasa ug mga sakit, ilabina ang hepatitis,” nag-ingon si Sharon Vernon, direktor sa Center for Bloodless Medicine and Surgery sa St. Vincent Charity Hospital sa Cleveland. Siya nagpadayon: “Bisan kon ang dugo dili magpasa ug impeksiyon kini makadaot sa pagsanong sa sistema sa imyunidad sa pasyente.” Bisag ang pagpasa sa AIDS nakunhoran pinaagig pagsala sa dugo, anaa gihapon ang daghang sakit nga makalusot nga dili mamatikdan sa maong mga pagsusi. Ug bisan pa sa panginahanglan sa mas dakong pagpangandam, ang walay-dugo nga pag-opera napamatud-ang makapadaginot sa mga ospital, sanglit magwala kini sa legal nga mga problema nga moresulta kon ang mga pasyente makadawat ug nahugawang dugo.

Alang sa mga Saksi ni Jehova, aduna pay mas hinungdanong katarongan sa paglikay sa pag-abunog dugo: Gidili kini sa kasugoan sa Diyos. (Buhat 15:29) Sa gihapon, sila buot nga makadawat ug kinamaayohang medikal nga pagtambal kutob sa mahimo. Busa, sila nakigkooperar uban sa mga doktor nga maoy nanguna sa panukiduki sa walay-dugo nga medikal nga pagtambal. Kini nga pagtambal nakahatag ug kaayohan dili lamang sa mga Saksi ni Jehova kondili usab sa daghan pang uban nga nabalaka bahin sa mga kapeligrohan sa mga pag-abuno ug dugo.

[Footnote]

[Picture Credit Line sa panid 32]

Letrato sa WHO ni P. Almasy