Siya Mapainubsanong Nag-alagad Kang Jehova
“DILI kaayo importante kon diin ka nag-alagad apan kon kinsay imong ginaalagaran ang tinuod nga importante.” Kanunay nga isulti ni John Booth kadtong mga pulonga, ug siya nagkinabuhi sumala gayod niana. Ang iyang yutan-ong kinabuhi, nga natapos niadtong Lunes, Enero 8, 1996, tin-awng nagpakita kon kinsay iyang gipili nga alagaran.
Ingong batan-on balik niadtong 1921, si John Booth nagpangita sa katuyoan sa kinabuhi. Nagtudlo siya sa Sunday school sa Dutch Reformed Church, apan wala siya mosugot sa ideya nga mabansay aron mahimong ministro sanglit gibati niyang nagkinabuhig hakog nga mga kinabuhi ang mga klero. Sa dihang nakita niya ang usa ka pahibalo alang sa usa ka pakigpulong nga nag-ulohang “Minilyong Buhi Karon Dili na Gayod Mamatay,” wala siya maglangan sa paghangyo sa literatura nga gipahibalo diha niana. Nakombinsir sa iyang nabasa, gibisikleta niya sa wala madugay ang 24 kilometros aron makatambong sa mga tigom sa mga Estudyante sa Bibliya, ingon sa pagtawag niadto sa mga Saksi ni Jehova. Gibawtismohan siya niadtong 1923 ug misugod sa pagsangyaw gikan sa pultahan ug pultahan sa rehiyon sa Wallkill, New York, diin may bakahan ang iyang pamilya.
Misulod si Igsoong Booth sa bug-os panahong ministeryo niadtong Abril 1928. Nagsangyaw siya sa iyang pinuy-anang teritoryo ug sa ilayang Habagatan, nga nagbugti sa literatura sa Bibliya alang sa pagkaon ug kasak-an. Giatubang niya ang mga kapeligrohan sama sa nagwarawarag-posil nga mga tag-iyag ilegal nga mga distileriya, nga ang usa nakaposil ug nakasamad sa kaubang payunir ni John Booth. Niadtong 1935, si Igsoong Booth gitudlo nga usa ka nagapanawng magtatan-aw ug misugod sa pagduaw sa mga kongregasyon ug sa gagmayng mga grupo sa tibuok nasod. Nag-organisar siya ug mga asembliya ug nagtabang sa mga igsoong lalaki ug babaye sa paglahutay bisan pa sa pagsupak. Ang pag-atubang sa nasukong panon sa mga manggugubot, ang pagbarog sa korte, ug ang pagkabilanggo tanan nahimong kasagarang mga hitabo alang kang Igsoong Booth. “Nagkinahanglag usa ka libro aron mahatag ang mga detalye niadtong makaiikag nga mga panahon,” siya kas-a misulat.
Niadtong 1941, giasayn ni Joseph F. Rutherford, kanhi presidente sa Watch Tower Society, si Igsoong Booth sa pagtrabaho sa Kingdom Farm, duol sa Ithaca, New York. Didto siya nag-alagad nga matinumanon sa 28 ka tuig. Ang iyang gugma sa ministeryo wala maawop, siya nalipay sa paglabay sa daghang tuig nga makauban ang libolibong mga estudyante sa Watchtower Bible School of Gilead alang sa misyonaryong mga pagbansay, nga nahimutang didto sa Kingdom Farm hangtod niadtong 1961. Niadtong 1970, gihangyo si Igsoong Booth sa pag-alagad sa mga Watchtower Farm sa Wallkill, New York, ug busa siya nakabalik sa mao gihapong dapit diin siya nagsugod sa pagpayunir mga 45 ka tuig ang miagi.
Niadtong 1974, si Igsoong Booth gitudlo nga usa ka membro sa Nagamandong Lawas sa mga Saksi ni Jehova sa Brooklyn, New York. Siya nag-alagad nga matinumanon niana nga kapasidad hangtod sa iyang kamatayon sa panuigong 93 anyos. Si John Booth gimahal tungod sa iyang mapainubsanon ug buotang Kristohanong personalidad. Hangtod nga nagluya ang iyang panglawas ug kusog, siya matinumanong nagsangyaw gikan sa pultahan ug pultahan ug diha sa kadalanan sa siyudad.
Bisag kadtong nag-alagad uban kaniya nagbangotan sa iyang kamatayon, sila nahupay sa saad sa Bibliya labot sa ingon niining dinihogang mga Kristohanon, nga sila banhawon sa langitnong kinabuhi ug nga “ang mga butang nga ilang gibuhat mahiuban dayon kanila.” (Pinadayag 14:13; 1 Corinto 15:51-54) Usa gayod ka bag-ong palibot, apan usa nga makaalagad si John Booth kang Jehova sa walay kataposan!
[Hulagway sa panid 32]
John Booth 1903-1996
[Hulagway sa panid 32]
HERALD-AMERICAN, ANDOVER 1234
76 Jehovites Jailed in Joliet
[Credit Line]
Chicago Herald-American