“Kamo Nanginahanglan ug Pag-agwanta”

KITA “nanginahanglan ug pag-agwanta,” aron kita makadawat “sa katumanan sa saad.” (Hebreohanon 10:36) Usa ka eskolar sa Bibliya misaysay nga ang Gregong pulong alang sa “pag-agwanta” nga gigamit ni apostol Pablo niining tekstoha usahay gamiton sa pagbatbat “sa katakos sa usa ka tanom nga mabuhi ubos sa malisod ug dili maayong mga kahimtang.”

Sa kabukiran sa Uropa, nagatubo ang ingon nianang tanoma. Medyo talagsaon, kini gitawag ug mabuhing walay kataposan. Siyempre, kining tanom sa alpino dili mabuhi sa walay kataposan apan kini molahutay sulod sa daghang katuigan, nga magpatungha ug matahom nga kabulakan matag ting-init. Ang The New Encyclopœdia Britannica misaysay nga ang ngalan nga mabuhing walay kataposan gihatag sa tanom tungod sa “pagkamalahutayon ug pagkamatunhayon” niini. (Ang siyentipikanhong ngalan alang niining mga tanoma sa genus nga Sempervivum nagkahulogan usab ug “mabuhing walay kataposan.”)

Ang naghimo niining malungtarong tanom nga talagsaon mao nga kini motubo diha sa kinadagolang mga dapit. Kini makaplagan sa tag-as kaayong mga dapit diha sa hanginong mga bakilid, diin ang temperatura mous-os hangtod sa 35 grado Sentigrado sulod lamang sa 24 ka oras. Kini mahimong mogamot diha sa batoong pangpang nga may diyutay kaayong yuta. Unsa ang pipila sa mga sekreto sa paglahutay niini sa maong malisod nga mga kahimtang?

Ang mabuhing walay kataposan adunay dugaon nga mga dahon, nga mainampingong magtipig ug tubig. Kini makapaarang niini sa pagpahimulos pag-ayo sa tanang kaumog nga mabatonan gikan sa ulan o sa nangatunaw nga niyebe. Dugang pa niana, kini motubo nga magpungpong nga magtingob sa ilang kalig-on aron lig-ong makagamot sa bato diin sila mitubo. Pinaagi sa paggamot diha sa mga pangpang, kini adunay proteksiyon batok sa daotang kapanahonan, bisan tuod nga adunay diyutay lamang nga yuta. Sa laing pagkasulti, kini mabuhi pinaagi sa pagpahimulos sa labing maayo gikan sa malisod nga mga kahimtang.

Sa espirituwal nga pagkasulti, tingali makaplagan nato ang atong kaugalingon diha sa mga kahimtang nga nagsulay sa atong pagkamalahutayon. Unsay motabang kanato sa paglahutay ilalom sa pagsulay? Sama sa tanom nga mabuhing walay kataposan, kita makatipig sa nagahatag-kinabuhi nga tubig sa Pulong sa Diyos ug makig-uban nga suod sa matuod nga mga Kristohanon alang sa pagpaluyo ug proteksiyon. Labaw sa tanan, sama sa bulak sa alpino, kinahanglang mokupot kita pag-ayo sa atong “bato,” si Jehova, maingon man sa iyang Pulong ug sa iyang organisasyon.​—2 Samuel 22:3.

Sa pagkatinuod, ang tanom nga mabuhing walay kataposan maoy usa ka madanihong tigpahinumdom nga, bisan sa maharasong kalikopan, kita makalahutay kon atong pahimuslan ang mga tagana nga mabatonan. Gipasaligan kita ni Jehova nga ang maong paglahutay motultol sa atong ‘pagpanunod sa mga saad,’ nga sa literal nagkahulogan ug pagkabuhing walay kataposan.​—Hebreo 6:12; Mateo 25:46.