Tinuod Gayod ang Ebanghelyo

TULO ka gagmayng mga piraso sa usa ka manuskrito sa Ebanghelyo ni Mateo, nga nailhang P⁶⁴, gipanag-iya sa Magdalen College sa Oxford, Inglaterra, sukad sa 1901. Dugaydugay na, ang mga eskolar nagtuo nga kini napetsahan balik pa sa ulahing bahin sa ikaduhang siglo K.P.

Niining bag-o, si Carsten P. Thiede, usa ka eksperto sa pagtuon sa papiro sa Paderborn, Alemanya, mihimog bug-os nga pagsusi sa P⁶⁴, nga gilangkoban sa mga bahin sa 10 ka bersikulo gikan sa Mateo kapitulo 26. Ang resulta? Nagsulat diha sa Zeitschrift für Papyrologie und Epigraphik (Journal of Papyrology and Epigraphics), gibatbat ni Thiede ang mga piraso sa Oxford ingong “usa ka Kristohanong codex nga piraso sa unang siglo, tingali (bisag dili kinahanglang) napetsahan balik pa sa AD 70.”

Ang mga obserbasyon ni Thiede nagpaukay sa prensa ug sa pundok sa mga eskolar. Ngano? Tungod kay ang gidawat sa pagkakaron ingong ang labing karaan nga nahibilin sa bahin sa teksto sa Ebanghelyo mao ang P⁵², usa ka piraso sa Ebanghelyo ni Juan gikan sa mga 125 K.P., o dili mas sayo pa kay sa ikaduhang siglo.

Kon kaha dawaton sa kadaghanan ang bag-ong petsa nga gihatag sa mga piraso nga papiro nga P⁶⁴ pagatan-awon pa. Bisan pa niana, ang mas sayosayo nga petsa dili lamang maghimo sa P⁶⁴ nga labing karaang mga piraso sa Ebanghelyo nga naglungtad; kini maghatag usab ug dugang ebidensiya nga magpaila nga ang Ebanghelyo ni Mateo gisulat gayod sa unang siglo, nga tingali wala pay 70 K.P., sa dihang ang daghang nakasaksi sa mga hitabo sa kinabuhi ni Jesus buhi pa sa pagpaluyo sa kamatuoran sa Ebanghelyo.

[Picture Credit Line sa panid 32]

Pinaagig permiso sa Presidente ug mga Kauban sa Magdalen College, Oxford.