Mga Magmamantala sa Gingharian Nagtaho
“Nagasidlak Ingong mga Magbabanwag sa Kalibotan”
ANG mga Saksi ni Jehova maoy talagsaon ug subsob nga makadawat ug daotang publisidad tungod sa dili nila pagpaabuno ug dugo. Hinunoa, kining maong posisyon lig-ong gipasikad sa Bibliya. Nagpakita kini nga gisaway sa Diyos ang sayop nga paggamit sa dugo, sanglit ang dugo bililhon sa iyang mga mata. (Genesis 9:3, 4; Levitico 17:14) Ingong resulta sa pagsusi sa Kasulatan bahin niining ulohana, ang mga Saksi ni Jehova nanghinapos nga ang sugo sa Bibliya sa ‘paglikay sa dugo’ tin-aw nga naglakip sa modernong paagi sa pag-abuno ug dugo.—Buhat 15:19, 20, 28, 29.
Sa di pa dugayng katuigan ang mga membro sa medikal nga komunidad, maingon man ang mga korte sa pipila ka nasod, mipaluyo sa mga Saksi ni Jehova bahin niining isyuha. Pananglitan, sa Denmark ang usa ka batan-ong inahan kinsa nasinati sa panglantaw sa Bibliya bahin sa dugo namatay ingong resulta sa aksidente sa sakyanan. Tungod sa iyang pagdumili sa pagpaabuno ug dugo, ang iyang mga doktor nag-awhag sa usa-ka-bulang mabatokong publisidad pinaagi sa palaumagian sa balita batok sa mga Saksi ni Jehova.
Ang mga ginikanan sa dalaga mihangyo ug usa ka pagsusi, ug sa Abril 1994 usa ka hukom ang gipahibalo sa Commission of Patients’ Complaints sa Denmark. Kini nag-ingon nga ang pasyente namatay, dili tungod sa pagdumili sa dugo, kondili tungod sa sayop nga medikal nga paagi. Ang hukom gipasikad sa mga pagsusi sa Board of Forensic Medicine ug sa mga awtoridad sa panglawas. Sa usa ka sulat ngadto sa tanang pasilidad sa pag-atiman sa panglawas sa Denmark, ang National Board of Health nag-ingon nga ang mga doktor adunay obligasyon sa paghatag sa mga Saksi ni Jehova sa labing maayong mabatonang kapuling tambal, nga magkonsiderar sa ilang pagdumili sa pagpaabuno ug dugo.
Ang laing kaso naglangkit kang Dan, usa ka 15-anyos nga Saksi nga namatay sa leukemia. Niining kasoha ang mga doktor nagtahod sa maisogong desisyon ni Dan sa pagdumili sa pagpaabuno ug dugo. Kini misangpot sa kaylap nga kampanya sa prensa diin ang palaumagian sa balita nagpasangil sa mga doktor sa kamatayon ni Dan. Daghan, hinunoa, ang wala mouyon sa negatibong propaganda.
Pananglitan, ang prinsipal sa eskuylahan nga gieskuylahan ni Dan mitambong sa Kingdom Hall panahon sa pakigpulong dayon sa paglubong. Gipahayag niya ang kakurat sa mapihigong pagkobre sa balita bahin sa kamatayon ni Dan. Human mangutana sa usa ka Saksi nga kaubang magtutudlo bahin sa mga Saksi ni Jehova, midawat siya ug kopya sa video nga Jehovah’s Witnesses—The Organization Behind the Name. Ang video nakadani pag-ayo kaniya nga iyang gihikay nga ang tanang magtutudlo sa eskuylahan motan-aw niana. Sa ulahi, ang video gipakita sa tanang estudyante, usa ka klase sa matag panahon.
Ang ministro sa panglawas sa Denmark misupak usab sa dili-maayong publisidad nga nadawat sa mga doktor ni Dan. Siya miingon nga ang mga doktor mihimo sa hustong butang sa pagtahod sa hamtong nga desisyon ug lig-ong pagtuo ni Dan.
Adunay minilyong magmamantala sa Gingharian nga nanagsugot sa mga balaod sa Diyos. Tungod sa ilang pagsugot, sila maoy lahi, nga “nagasidlak ingong mga magbabanwag sa kalibotan.”—Filipos 2:12, 15.