Mga Abuno sa Dugo Gihunahuna Pag-usab

NIINING mangiob nga panahon sa AIDS, ang kinadak-ang kapeligrohan sa panglawas sa usa ka pasyente sa ospital tingali nagpahipi diha sa lawak nga operahanan. “Walay paagi nga mahimo natong bug-os nga walay kagaw ang abiyo sa dugo,” matud ni Dr. Richard Spence, kinsa sulod na sa kapig usa ka dekada maoy nagdumala sa Sentro sa Walay-Dugo nga Siruhiya sa Cooper Hospital-University Medical Center sa Camden, New Jersey, T.B.A.

Dili ikatingala, ang ospital nagtambal ug daghang Saksi ni Jehova, kansang gibase-sa-Bibliya nga pagdumili sa mga abuno sa dugo maoy ilado kaayo. (Levitico 17:11; Buhat 15:28, 29) Bisan pa niana, ang ubay-ubayng dili-Saksing mga pasyente nanganha usab sa ospital, kay nabalaka sa lagmit nga mga kapeligrohan sa pag-abuno ug dugo, nga naglakip sa pagkamatakdan sa hepatitis, AIDS, ug ubang mga sakit. “Ang pagtungha sa AIDS nagpadayag sa panginahanglan nga susihon ang dugo,” nagpahayag ang Courier-Post Weekly Report on Science and Medicine. “Apan ang pila ka kaso makayuhot gihapon sa proseso sa pagsusi tungod kay may usa nga tingali natakdan sa kagaw sa wala pa kini himatikdi diha sa usa ka pagsusi.”

Tungod sa maong mga kapeligrohan, ang Sentro sa Walay-Dugo nga Siruhiya naggamit ug mga kapuli sa mga abuno sa dugo, lakip ang pagpasulod pag-usab sa kaugalingong dugo sa pasyente​—usa ka teknik nga tingali dili ayran sa pipila ka Saksi ubos sa pila ka kahimtang.a Ang laing pagtambal naglangkit sa paggamit ug mga droga nga mopakusog sa paggama sa pasyente ug dugo. Dugang pa, ang sentetikong kapuli sa dugo usahay gamiton aron pakusgon ang paghatod ug oksiheno nga dili na kinahanglan ang giabunong dugo. “Ang mga Saksi ni Jehova gusto sa labing maayong medikal nga pag-atiman,” matud ni Dr. Spence, “apan gusto nilag mga kapuli sa mga abuno.”

Ang mga Saksi ni Jehova mapasalamaton sa kooperasyon ug tabang nga ilang nadawat gikan sa mga doktor nga nagtahod sa ilang relihiyosong mga pagtuo. Ingong resulta, sila tinuod nga nakadawat sa “labing maayong medikal nga pag-atiman” ug padayong nakahupot ug mahinlong konsensiya atubangan kang Jehova nga Diyos.​—2 Timoteo 1:3.

[Footnote]