“Saylo pa sa mga Utlanan sa Maayong Kaisipan”

“SANGLIT ang mga gubat magsugod diha sa mga hunahuna sa mga tawo, diha sa mga hunahuna sa mga tawo nga kita angayng magtukod ug mga balwarte sa kalinaw.” (Karta sa UN Educational, Scientific, and Cultural Organization) Uban niining maong pahayag sa hunahuna, sa 1993 kapin sa 500 ka eksperto nga nagtambong sa usa ka komperensiya sa HK bahin sa pagdis-armar naghisgot sa bahin sa relihiyon sa pagtukod sa maong mga balwarte.

Si Jonathan Granoff, nga naghawas sa Alyansa sa mga Abogado Alang sa Kasegurohan sa Kalibotan, maoy nagdumala sa komperensiya. Siya miingon: “Ang gilapdon sa presenteng relihiyoso ug etnikong panagbangi maoy saylo pa sa mga utlanan sa sibilisadong kagawian, posibleng saylo pa sa mga utlanan sa maayong kaisipan.” Ang mga pulong ni John Kenneth Galbraith tukmang gikutlo panahon sa komperensiya: “Mas daghang tawo ang namatay sa ngalan sa relihiyon kay sa tanang gubat ug kinaiyanhong mga katalagman nga gitingob.”

Si Dr. Seshagiri Rao miingon: “Ang mga doktor magatambal unta ug dili magkaylap ug mga sakit. Ang relihiyosong mga tradisyon dili unta magkaylap ug pagdumot ug mapintas nga panagbangi batok sa usag usa. Sila angay untang mahimong mga puwersa alang sa pag-uliay sa maayong kabubut-on. Hinuon, sa pagkatinuod, sila subsob nga milihok ug naglihok pa gihapon ingong mabahinbahinong mga puwersa.”

Pipila ka tuig kanhi, ang Catholic Herald sa Londres miingon nga ang kalinaw maseguro “kon ang mga iglesya karong adlawa mopahayag ug duyog nga pagsaway sa gubat.” Hinunoa, ang mantalaan midugang: “Nasayod kami nga dili gayod kini mahitabo.” Usa ka Katolikong madre ang miingon kanhi: “Pagkalahi gayod unta sa kalibotan kon kitang tanan mohimo dayon ug hugot nga desisyon nga dili na moapil pag-usab sa gubat, . . . sama sa mga Saksi ni Jehova!”

[Picture Credit Line sa panid 32]

Tom Haley/Sipa Press