“Malipayong mga Magdadayeg” nga Kombensiyon—Atua Ka ba Unya Didto?

KALIPAY! Ang mao bang pulong bag-o sa pandungog, dili gani haom, niining punog-kagubot nga panahon? Sa pagkatinuod ang mga mantalaan wala maghatag ug daghang hinungdan nga magmalipayon. Ang etnikong paggubatay, kaylap nga kagutom, kawalay-trabaho, peligrosong polusyon, kahuyang sa politika, krimen​—dili kini mga butang nga magtugob sa kasingkasing sa kalipay, dili ba?

Kadaghanang tawo karong adlawa mosakmit sa bisan unsang kahimuot nga ilang makuha gikan sa kinabuhi. Apan ang kalipay? Ang kalipay gibatbat ingong “masadya nga kahimtang; pagmaya.” Dili kaayo daghan ang nakasinati ug tinuod nga kalipay, ug kon makasinati man sila, kasagarang dili gayod kini dumalayon.

Bisan pa niana, nga naglantaw sa atong adlaw, ang Bibliya nagtagna: ‘Mao kini ang giingon sa Soberanong Ginoong Jehova: “Tan-awa! Ang akong mga alagad managmaya. Tan-awa! Ang akong mga alagad managsinggit sa kalipay tungod sa maayong kahimtang sa kasingkasing.”’ (Isaias 65:13, 14) Sa unsang paagi kana mahitabo?

Aron masayran ang tubag, gidapit namo kamo sa pagtambong sa usa sa distritong mga kombensiyon sa mga Saksi ni Jehova nga pagahimoon niining tuiga. Ang tema sa mga kombensiyon maoy “Malipayong mga Magdadayeg,” ug libre ang pagtambong. Ang programa sa tulo-ka-adlaw nga kombensiyon maglangkob sa binase-sa-Bibliya nga mga pakigpulong, mga demonstrasyon, mga panaghisgot, ug uban pa. Sa tibuok programa, ang tema nga kalipay ipasiugda.

Kining maong serye sa mga kombensiyon nagsugod sa Tinipong Bansa niadtong Hunyo ug magpadayon sa mga siyduad sa tibuok kalibotan hangtod sa sayong bahin sa 1996. Lagmit, adunay usa nga haduol kanimo. Nganong dili mangutana sa mga Saksi ni Jehova nga nagpuyo sa inyong dapit? Mainiton namo kamong gidapit nga maatua didto.