Mga Magmamantala sa Gingharian Nagtaho
Ang Katawhan sa Diyos Kinabubut-ong Nagatanyag sa Ilang Kaugalingon
JOSE ang iyang ngalan, ug siya usa ka lumad sa isla sa Cipro. Apil siya sa unang-siglong mga Kristohanon nga nagbaligya ug mga uma ug mga balay aron makaamot ug salapi alang sa pag-uswag sa Kristiyanidad. Tungod sa iyang pagkamabination ug pagkamanggihatagon, siya nailhan nga Barnabas, nga nagkahulogang “Anak sa Paghupay.”—Buhat 4:34-37.
Ang maong tiunayng interes sa uban kanunay gayong usa ka timailhan sa matuod nga mga magsisimba ni Jehova. Ingon usab niana ang mga Saksi ni Jehova karong adlawa, sumala sa gipasiugda niining mosunod nga kasinatian gikan sa Solomon Islands.
Usa ka pundok sa kapin sa 60 ka Saksi gikan sa Australia ug New Zealand mibiyahe paingon sa Honiara, ang kabisera sa Solomon Islands diha sa Guadalcanal. Sila miadto aron motabang sa pagtukod sa usa ka Assembly Hall alang sa dagkong Kristohanong mga tigom. Gidangtan lamang ug mga duha ka semana ang pagtukod nila sa tigomanan nga mahimong malingkoran sa mga 1,200!
Sa ingon-ingong panahon, ang lokal nga mga awtoridad sa gamayng lungsod sa Munda, sa isla sa New Georgia, mihatag sa kongregasyon sa mga Saksi ni Jehova ug usa ka lote diha gayod sa kinapusoran sa lungsod. Buot nilang magtukod ug usa ka Kingdom Hall, usa ka dapit sa pagsimba. Ug nanginahanglan gayod sila niana. Nagtigoman sila sa usa ka sala sa usa ka gamayng balay nga nipa, apan wala silay kahinguhaan sa pagtukod ug usa ka Kingdom Hall.a Kadaghanan diha sa kongregasyon maoy mga tigulang ug luyahong mga tawo ug mga bata, ug walay usa nga may kasinatian sa pagpanukod.
Mga 380 kilometros ang gilay-on, sa isla sa Guadalcanal, ang mga Saksi sa siyudad sa Honiara kinabubut-ong mitanyag sa ilang kaugalingon. (Salmo 110:3) Sila nangatarongan: “Kon ang atong mga igsoon sa ubang mga nasod kinabubut-ong nagtukod alang kanato ug usa ka Assembly Hall sulod sa duha ka semana, nan kita makatabang gayod sa atong mga igsoon sa Munda ug tukoran sila ug Kingdom Hall sulod sa duha ka semana.”
Mao kanay nahitabo. Usa ka adlaw niana ang usa ka lansa nga puno sa malipayon ug mahinamong mga boluntaryong mga Saksi miabot sa Munda. Ang mga lalaki ug mga babaye, tigulang ug bata, ngatanan nagmapuliki sa paghaw-as sa ilang mga karga ug nangandam aron sugdan ang pagtukod ginamit ang kahoy, semento, sin, ug ubang materyales nga miabot sa Munda una kanila.
Wala madugay human magsugod ang pagtukod, usa ka grabeng bagyo ang nagdaot sa abiyo sa tubig sa lungsod. Apan, wala kini mahimong dakong suliran. Ang mga Saksi nagkalot ug usa ka atabay nga nagtagana ug tubig sulod sa tibuok kalihokan sa pagtukod. Komosta ang pagkaon alang sa tanang trabahante? Dili usab kadto suliran. Ang mga boluntaryo gikan sa Honiara gipadala uban ang daghang pagkaon nga gitagana sa mga kongregasyon sa Honiara. Nagdala pa gani sila sa ilang kaugalingong mga kusinero!
Ang mga silingan nahingangha pag-ayo nga nagtan-aw sa pag-uswag sa proyekto. Usa kanila ang miingon: “Kasagaran ang dagkong mga proyekto dili matapos sulod sa pipila lamang ka adlaw. Dangtan kinig tinuig.” Ang laing silingan, nga usa ka relihiyosong lider, midawat nga ang iyang simbahan ginatukod sulod sa milabayng 20 ka tuig ug wala pa gihapon mahuman. Sa kaatbang, ang bag-ong Kingdom Hall sa mga Saksi ni Jehova sa Munda natapos sulod lang sa napulo ka adlaw!
[Footnote]
a Usa ka balay nga nipa nga ginama gikan sa materyales nga gipamutol gikan sa kalibunan o kalasangan. Hinimo sa mga lipak ug mga palo ang tigbayon, ug inaptan ug gibungbongan ug mga pinawod nga nipa.
[Mapa sa panid 24]
(Alang sa aktuwal nga pagkahan-ay, tan-awa ang publikasyon)
Habagatang Dagat Pasipiko
SOLOMON ISLANDS
Munda
GUADALCANAL
Honiara
[Mapa]
AUSTRALIA
NEW ZEALAND