Kamamugnaon—Usa ka Malulutong Gasa Gikan sa Diyos

SI Jehova nagamaya diha sa iyang mamugnaong mga buhat. (Salmo 104:31) Ang dulot nga katagbawan nga iyang nakuha gikan sa buhat sa paglalang gipahayag diha sa Genesis 1:31: “Nakita sa Diyos ang tanan nga iyang gibuhat ug, tan-awa! kini maayo kaayo.”

Si Jehova wala maglimite niining maong kalipay sa iyang kaugalingon. Gihatagan niya si Jesus sa pribilehiyo nga mahimong ahente, o galamiton, nga pinaagi kaniya ang tanang ubang mga butang gilalang. (Juan 1:3; Colosas 1:16, 17) Ingong “batid nga magbubuhat,” si Jesus usab “nagakalipay kanunay diha sa atubangan [ni Jehova].”​—Proverbio 8:30, 31.

Apan ang katakos sa pagkamamugnaon wala lamang maglungtad sa langit. “Kini gidesinyo ingong kinaiyanhong bahin sa katawhan,” misulat si Eugene Raudsepp sa iyang librong How Creative Are You? Kini dili sulagma lamang, tungod kay ang tawo gihimo diha sa dagway sa Diyos. (Genesis 1:26) Sa ingon si Jehova naghatag sa katawhan ug makapatagbawng mga katakos sa pagkamamugnaon.​—Santiago 1:17.

Busa, dili ikatingala nga ang Bibliya naghisgot nga mauyonon sa pag-awit, pagsayaw, paghabol, pagluto, kahanas sa arte, ug ubang mamugnaong mga trabaho. (Exodo 35:25, 26; 1 Samuel 8:13; 18:6, 7; 2 Cronicas 2:13, 14) Si Bezalel, usa ka artesano, naggamit sa iyang abilidad diha sa “pagdesinyo ug mga galamiton” sa pagtabang diha sa pagtukod sa tabernakulo. (Exodo 31:3, 4) Ang magbalantay sa karnero nga si Jabal hayan maoy nag-imbento sa tolda, usa ka mamugnaong kasangkapan alang sa kinabuhing nagapanaw. (Genesis 4:20) Si David dili lamang usa ka musikero ug usa ka tigkomposo, kondili usa usab ka tighimo ug bag-ong mga galamiton sa musika. (2 Cronicas 7:6; Salmo 7:17; Amos 6:5) Si Miriam tingali maoy nagmugna sa masadyaong pagsayaw nga nagsaulog sa milagrosong pagkaluwas sa mga Israelinhon tabok sa Pulang Dagat.​—Exodo 15:20.

Ang kamamugnaon kasagaran maoy usa ka katakos diha sa pagpasiugda sa matuod nga pagsimba. Si Jesus mamugnaong naggamit ug mga ilustrasyon ug makapatandog nga mga leksiyon sa pagpasa sa iyang mensahe. Ang iyang mga sumusunod giawhag usab nga ‘maghago sa pagpamulong ug sa pagpanudlo.’ (1 Timoteo 5:17) Oo, ang ilang buluhatong pagsangyaw dili lamang usa ka rotina. Kini maoy usa ka arte nga nagkinahanglan ug mamugnaong mga paagi sa pagtudlo. (Colosas 4:6) Kini ilabinang hinungdanon sa dihang nagatudlo sa kaugalingong mga anak.​—Deuteronomio 6:6, 7; Efeso 6:4.

Busa, si Jehova nakig-ambit sa uban sa kangaya nga gihatag sa paglalang ngadto kaniya. Pagkamalulutong gasa!