“Mao Kana ang Angay nga Paggawi sa Tinuod nga mga Kristohanon”

DIHA sa iyang 1990 nga libro nga Arbeit macht tot​—Eine Jugend in Auschwitz (Work Kills You​—Young Manhood in Aushwitz), gisulat ni Tibor Wohl nga usa ka nakalabang-buhi sa Auschwitz ang bahin sa usa ka kabildohay nga iyang nadunggan tali sa duha ka isigka-binilanggo. Ang usa, taga-Austria, nga nag-angkong “dili-magtutuo.” Bisan pa, iyang gidayeg ang mga binilanggo nga nagsul-ob ug kolor ube nga triyanggulong insigniya​—ang mga Estudyante sa Bibliya, nga maoy pagtawag sa mga Saksi ni Jehova diha sa kampo.

“Dili sila makiggubat,” matud sa Austriano ngadto sa iyang kauban. “Mosugot pa silang patyon inay mopatay kang bisan kinsa. Sa akong hunahuna mao kana ang angay nga paggawi sa tinuod nga mga Kristohanon. Isugilon ko gayod nimo ang maayo kaayong hitabo nga akong naeksperyensiyahan uban kanila. Nakauban namo ang mga Hudiyo ug ang mga Estudyante sa Bibliya sa usa ka tinukod sa kampo sa Stutthof. Niadtong panahona ang mga Estudyante sa Bibliya gipatrabahog bug-at, sa gawas nga grabe kaayo ka tugnaw. Wala kami makasabot kon nganong sila nakaagwanta. Matud nila gihatagan silag kusog ni Jehova. Kinahanglan gayod nila ang ilang tinapay, sanglit sila gigutom. Apan unsay ilang gihimo? Ilang gitigom ang tanang tinapay nga ilang nabatonan, gitunga kana ug gihatag ang katunga ngadto sa ilang mga igsoon, ilang espirituwal nga mga igsoon, nga miabot nga gigutom kaayo gikan sa ubang mga kampo. Ug giabiabi nila sila ug gihagkan sila. Una sila mangaon, nag-ampo sila, ug human niana mabanaag ang kalipay sa ilang mga nawong. Moingon sila nga wala nay gigutom. Busa, nakasabot ka na, kon nganong nakaingon ako sa akong kaugalingon, ‘Mao kini ang tinuod nga mga Kristohanon.’ Mao kanay akong gihunahuna kanunay nga angay nga ingon sila niana. Pagkanindot seguro ang paghatag ug ingon niana nga pag-abiabi sa gigutom nga mga kauban dinhi sa Auschwitz!”