Maisogong Pagtuo sa Atong mga Igsoon sa Rwanda
SAYO sa 1994 ang kalibotan nakurat samtang ang mga taho sa dinaghang pagpatay migula gikan sa Aprikanhong nasod sa Rwanda. Ang usa ka mabangis nga sibil nga gubat mibuto—ang gisangpotan sa kasiglohang pagdumtanay.
Giatubang sa bug-os nga pagkahugno sa balaod ug kahusay, ang 2,000-ug-kapin-pang mga Saksi ni Jehova sa Rwanda napugos sa pagkalagiw alang sa ilang mga kinabuhi. Mga 1,300 ang midangop sa mga kampo sa mga lalin sa haduol nga Zaire ug Tanzania, apan ang pipila wala dayon makaikyas. Naguol kami sa pagtaho nga mga 400 sa atong mga igsoong lalaki ug babaye—mga hamtong ug mga bata, siyempre, ang tanan mga sibilyan—nangamatay sa binuang nga kapintasan. Ang mga Kristohanon sa tibuok kalibotan nagbangotan sa kamatayon niining maisogong mga tighupot sa integridad ug nahupay sa saad sa Bibliya sa usa ka pagkabanhaw.—Juan 11:25.
Unsay gidangatan sa buhi pa nga mga igsoong lalaki ug babaye sa Rwanda? Ang mga ansiano gipadala gikan sa pila ka nasod sa pagsusi dayon sa mga butang. Usa ka taho nag-ingon nga ang mga igsoon sa Rwanda nakaatubang sa kahimtang “uban sa tumang dignidad ug kaisog.” Pananglitan, usa sa unang mga hangyo sa mga igsoon mao ang literatura sa Bibliya. ‘Daw labi pa silang nabalaka bahin sa pagdawat ug espirituwal nga pagkaon kay sa materyal nga tabang, bisan tuod sila nanginahanglan kaayo sa daghang butang,’ mihinapos ang taho. Ug bisan tuod nga ang mga kahimtang sa kampo kinaraan kaayo, ‘ang kinalimpiyohang bahin mao ang gipuy-an sa atong mga igsoon.’
Gihikay sa Watch Tower Society nga mabatonan ang salapi aron sa pagpalit ug pagkaon, mga habol, sinina, sapatos, ug tambal. Ang atong mga igsoon sa Pransiya daghan ug giamot, ug sa sayong bahin sa Hunyo, halos duha ka toniladang abiyo ang gipadala pinaagig barko ngadto sa atong nanginahanglang mga igsoon sa Rwanda.
Dili ikatingala, kining mga kahimtanga miresulta sa maayong pamatuod. Ang mga tigpaniid natandog sa kamatuoran nga ang atong mga igsoon sa Rwanda nakadawat sa maong tabang ug pagpaluyo gikan sa kaubang mga Saksi, ug nahimong posible ang pagpakig-ambit niining maong tabang sa uban. Ang pipila mikomento nga ang mga Saksi mao lamang ang mga tawo sa kampo nga giduaw sa mga membro sa ilang relihiyon!
Ang kalisod sa atong mga igsoon sa Rwanda nagpahinumdom kanato nga niining “kataposang mga adlaw,” ang mga tawo mahimong “mabangis” ug “mapintas.” (2 Timoteo 3:1-5; Today’s English Version) Ug bisan tuod si Jehova wala magsaad sa iyang katawhan ug milagrosong panalipod gikan sa pisikal nga mga kapeligrohan, siya nagsaad nga bantayan ang ilang espirituwalidad ug relasyon uban kaniya ug, panahon sa Milenyong pagmando ni Kristo, banhawon kadtong nangamatay karon. (Salmo 91:1-10) Hinaot nga ang atong mga pag-ampo nga si Jehova magaamoma ug magatabang sa atong buhi pa nga mga igsoon sa Rwanda panahon niining masulayong panahon padayong igatanyag alang kanila.—Salmo 46:1.