Nagkadungan Sulod sa Napulo ka Tuig!
SA GIPANGUTANA kon unsay iyang gibati napulo ka tuig kanhi sa dihang ang Kinatsila nga edisyon sa Ang Bantayanang Torre gisugdan sa pagpatik nga dungan sa Ingles, usa ka minahal nga igsoong babayeng Español mitubag: ‘Gibati namo nga usa kana ka panalangin tungod kay karon kami makadungan na sa Ingles. Sa dihang ako moingon ug Ingles, sa tanang panahon ako naghunahuna sa organisasyon ni Jehova. Gitawag namo ang organisasyon nga “Mama.” Mibati kaming suod, suod kaayo nga nakig-uban. Kana matahom. Kana kahibulongan!’
Kining matinumanong igsoong babaye nagpahayag sa mga pagbati sa daghang dili-Ingles nga mga magbabasa. Sa miaging mga tuig, ang mga artikulo migula sa Kinatsilang edisyon sa Ang Bantayanang Torre mga unom ka bulan human kini sila gipatik sa Ingles. Ang ubang mga pinulongan nakasinatig samang kalangan. Masabot, dihay hugot nga tinguha sa pagpatik sa samang materyal, sa samang panahon, diha sa daghang pinulongan.
Busa sugod sa gula sa Abril 1, 1984, ang Kinatsilang edisyon maoy unang nahimong dungan sa Ingles nga edisyon. Ang ubang mga pinulongan misunod sa wala madugay. Sa pagsugod sa 1985, ang mga edisyon sa 23 ka pinulongan maoy dungan. Sa gipangita ug gibansay ang mga maghuhubad, ang mga edisyon sa dugang mga pinulongan nakaapas sa Ingles.
Kining gulaa sa Ang Bantayanang Torre nagtimaan sa ikanapulong tuig sa dungang pagpatik. Ang Bantayanang Torre gipatik na karon sa 116 ka pinulongan, nga 85 kanila ang magkadungan. Kini nagkahulogan nga 99.3 porsiento sa katibuk-ang aberids nga produksiyon sa 16,100,000 ka kopya sa Ang Bantayanang Torre ang gigama uban sa samang desinyo sa hapin ug mga artikulo. Niadtong nagatambong sa senemanang Pagtuon sa Bantayanang Torre, kapin sa 95 porsiento ang nagkonsiderar sa samang materyal sa samang panahon.
Ang Pagmata!, ang kaubang magasin sa Ang Bantayanang Torre, gipatik nga dungan sa 37 sa 74 ka pinulongan niini. Ang tinuig nga Yearbook of Jehovah’s Witnesses gipatik sa 18 ka pinulongan. Ang maong dungan nga pagpatik naghiusa sa katawhan sa Diyos “sa samang kaisipan ug diha sa samang dalan sa panghunahuna.”—1 Corinto 1:10.