Mga Pangutana Gikan sa mga Magbabasa

Ang Diyos mipasidaan kang Cain nga ‘ang sala nag-ukoy sa ganghaan ug nagtinguha kini kaniya,’ nga daw nagpasabot sa usa ka mapintas nga mananap ug sa tukbonon niini. (Genesis 4:7) Nganong gigamit man kining pinulongana dihang una pa sa Lunop, ang mga hayop nagkaon lamang ug tanom?

Sa mga basahon nga gisulat ni Moises, ubay-ubayng bersikulo ang makaplagan natong nagbanaag sa mga panghitabo o makasaysayanhong mga kaugmaran nga daw katingad-ang dili mohaom sa makasaysayanhong kahimtang niini.

Pananglitan, ang asoy sa Genesis 2:10-14 naghatag ug geograpikanhong detalye mahitungod sa tanaman sa Eden. Si Moises nagsulat nga usa ka suba “nag-agos sa silangan sa Asiria.” Apan ang yuta sa Asiria nagkuha sa ngalan niini sa Asshur, anak ni Shem nga natawo human sa Lunop. (Genesis 10:8-11, 22; Ezekiel 27:23; Miqueas 5:6) Lagmit, sa iyang tukma, dinasig nga asoy, si Moises yanong migamit sa terminong “Asiria” sa pagtumong sa usa ka rehiyon nga sinati sa iyang mga magbabasa.

Tagda ang laing pananglitan gikan sa unang mga kapitulo sa Genesis. Human makasala si Adan ug Eva ug gipalagpot gikan sa tanaman, gipugngan sila ni Jehova sa pagbalik. Sa unsang paagi? Ang Genesis 3:24 nag-ingon: “Gipapahawa niya ang tawo ug gibutang niya sa may silangan sa tanaman sa Eden ang mga querubin ug ang nagadilaab nga sulab sa espada nga naglisoliso aron sa pagbantay sa dalan sa kahoy sa kinabuhi.” Matikdi, “ang nagdilaab nga sulab sa espada.” Ang Diyos ba nag-imbentog mga espada?

Kita dili kinahanglang maghinapos nga ang atong mahigugmaong Maglalalang maoy unang migama sa gitawag natong mga espada. Si Adan ug si Eva nakakita sa atubangan sa mga manulonda sa usa ka butang nga nagdilaab. Unsa ba gayod kadto? Sa panahon nga gisulat ni Moises ang basahon sa Genesis, ang mga espada maoy ilado na ug gigamit sa gubat. (Genesis 31:26; 34:26; 48:22; Exodo 5:21; 17:13) Busa ang mga pulong ni Moises nga “ang nagadilaab nga sulab sa espada” nakapaarang sa iyang mga magbabasa sa paghanduraw sa usa ka sukod kon unsa ang didto sa ganghaan sa Eden. Ang impormasyon nga nahibaloan sa adlaw ni Moises nakatabang sa pagsabot sa maong mga butang. Ug ang pinulongan nga gigamit ni Moises tinong tukma, kay kadto gipatala ni Jehova sa Bibliya.​—2 Timoteo 3:16.

Nan komosta na man ang Genesis 4:7? Didto ang Diyos nagpasidaan kang Cain: “Kon mobuhat kag maayo, dili ba nga kana pagadayegon? Apan kon dili maayo ang imong buhaton, ang sala nagaukoy sa ganghaan, ug ikaw ang gitinguha niini; ug ikaw, sa imong bahin, magabuot niini?” Sumala sa gipahayag, ang pinulongan daw naghulagway sa usa ka gigutom mapintas nga mananap nga nag-ukoy sa pagtukob ug paglamoy sa iyang tukbonon.

Bisan pa, ang ebidensiya sa Bibliya nagpunting kang Adan ug Eva nga may kalinaw uban sa tanang hayop. Ang pila ka linalang daw anad uban sa mga tawo, gani nakapahimulos sa pagkinabuhi duol sa tawo. Ang uban maoy ihalas nga mga mananap, mga hayop nga kinaiyanhong mopuyo layo sa tawo. (Genesis 1:25, 30; 2:19) Apan, ang Bibliya wala magsugyot nga ang bisan unsang hayop mikaon sa ubang mga hayop o sa tawo. Sa sinugdan, espisipikong gihatag sa Diyos ang mga tanom ingong pagkaon sa mga hayop ug sa tawo. (Genesis 1:29, 30; 7:14-16) Kana wala mausab hangtod human sa Lunop, sumala sa gipaila sa Genesis 9:2-5.

Nan, unsa man ang mahitungod sa pasidaan sa Diyos kang Cain, ingon sa atong mabasa sa Genesis 4:7? Walay duda nga ang larawan sa usa ka mapintas nga mananap nga nag-ukoy ug andam sa pagtukob sa tukbonon dali kaayong masabtan sa adlaw ni Moises, ug nasabtan usab nato kana. Busa, sa makausa pa, si Moises tingali migamit sa pinulongan nga gipahaom alang sa mga magbabasa nga sinati sa liwas-Lunop nga kalibotan. Ug bisan kon si Cain wala pa gayod makakita sa maong linalang, masabtan gayod niya ang punto sa pasidaan nga nagpanag-ing sa makasasalang tinguha diha kaniya sa usa ka gigutom, manunukob mapintas nga mananap.

Ang pangunang mga bahin nga angayng hatagan natog pagtagad mao kini: Ang kalulot sa Diyos sa pagpasidaan kang Cain, ang bili sa mapaubsanong pagdawat sa tambag, kon unsa ka daling makadaot ang pangabubho, ug kon unsa ka seryoso nga angay natong tagdon ang ubang diyosnong mga pasidaan nga gibutang sa Diyos diha sa Kasulatan alang kanato.​—Exodo 18:20; Ecclesiastes 12:12; Ezekiel 3:17-21; 1 Corinto 10:11; Hebreohanon 12:11; Santiago 1:14, 15; Judas 7, 11.