Nakahinumdom Ka Ba?

Nakaplagan mo bang ang dili pa dugayng mga isyu sa Ang Bantayanang Torre may mapuslanong bili alang kanimo? Nan nganong dili sulayan ang imong panumdoman sa mosunod nga mga pangutana:

▫ Kon mosulod ang bisan unsang imoral nga hunahuna sa atong kaisipan nga wala dapita, unsay angay natong buhaton? Atong usbon ang talan-awon sa hunahuna, lakaw sa gawas, pagbasa, o pagkurikuri sa balay. Ang pag-ampo ilabina maoy gamhanang tabang niining bahina. (Salmo 62:8)​—4/15, panid 17.

▫ Nganong ang mga batan-on kinahanglang magbantay bahin sa matang sa musika nga ilang ginapamati? Ang musika adunay gahom nga makapalihok, makapadani, ug makaimpluwensiya. Sanglit daghang popular nga mga piyesa sa musika dunay makapakurat nga gidaghanon sa seksuwal nga mga pasumbingay ug tagong mga paghisgot sa imoralidad, daling makita nga dakong pagbantay ang gikinahanglan sa pagpili ug mga plaka, teyp, ug mga disc.​—4/15, panid 20-1.

▫ Unsay kahulogan sa ekspresyong “ang presensiya sa atong Ginoong Jesu-Kristo?” (1 Tesalonica 5:23) Kini nagtumong sa dili makita harianong presensiya sa Ginoong Jesu-Kristo ingong Hari, gikan sa 1914, ug human sa iyang pagkaentrono sa langit. (Salmo 110:1, 2)​—5/1, panid 11.

▫ Unsang katuyoan ang gialagaran sa paghinlo ni Jehova sa iyang espirituwal nga templo? (Malakias 3:1-4) Gusto ni Jehova nga ang iyang templo anaa sa mahinlong kahimtang aron inigsulod didto sa daghang magsisimba nga may yutan-ong paglaom, ilang makaplagan ang usa ka dapit diin gitahod ang iyang unibersohanong pagkasoberano, diin gibalaan ang iyang balaang ngalan, ug diin gisugot ang iyang matarong nga mga balaod.​—5/1, panid 16.

▫ Unsang “mga kabtangan” ang gipiyal ni Kristo Jesus ngadto sa iyang gitudlong ulipon? (Mateo 24:45-47) Kining “mga kabtangan” nagtumong sa tanang espirituwal nga katigayonan sa yuta nga nahimong propiedad ni Kristo may kalabotan sa iyang awtoridad ingong langitnong Hari. Kini naglakip sa sugo sa paghimog mga tinun-an ni Kristo gikan sa katawhan sa tanang kanasoran. (Mateo 28:19, 20)​—5/1, panid 17.

▫ Sa unsang paagi ikapakita sa Kristohanong mga ansiano ang ‘kinabubut-on’ nga pagbantay sa panon, sumala sa giagda ni apostol Pedro sa 1 Pedro 5:2? Ang Kristohanong ansiano nga nagaatiman sa mga karnero nagabuhat sa iyang pagbantay nga kinabubut-on, sa iyang kaugalingong pagbuot, ubos sa pagdumala sa Maayong Magbalantay, si Jesu-Kristo. Ang pag-alagad nga kinabubut-on nagkahulogan usab nga ang Kristohanong magbalantay magpasakop sa awtoridad ni Jehova ug magpakitag pagtahod sa teokratikanhong kahikayan.​—5/15, panid 20.

▫ Unsay gipasabot ni Jesus sa dihang miingon siya nga ang bisan kinsa nga buot mosunod kaniya “magdumili sa iyang kaugalingon”? (Mateo 16:24) Ang ‘pagdumili sa kaugalingon’ nagkahulogan nga gitugyan mo ang pagpanag-iya sa imong kaugalingon ngadto kang Jehova. (1 Corinto 6:​19, 20) Kini nagpasabot nga ikaw nagkinabuhi, dili sa pagpahimuot sa kaugalingon, apan sa Diyos. (Roma 14:8)​—6/1, panid 9.

▫ Unsay gikinahanglan aron magmalipayon ang usa ka tawo? Ang pagtagamtam ug maayong relasyon uban kang Jehova ug padayong puliki sa pag-alagad kaniya mohatag ug matuod nga kalipay sa kinabuhi sa usa ka tawo.​—6/1, panid 22.

▫ Nganong gitugotan ni Jehova si Abraham ug dakong kagawasan sa pagpakigsulti kaniya bahin sa Iyang katuyoan sa paglaglag sa Sodoma? (Genesis 18:22-32) Usa ka katarongan mao nga si Abraham higala sa Diyos. (Santiago 2:23) Dugang pa, si Jehova nahibalo sa gibating mga kasubo ni Abraham. Nahibalo ang Diyos nga ang pag-umangkon ni Abraham nga si Lot nagpuyo sa Sodoma ug nga si Abraham nabalaka kaayo sa kahilwasan ni Lot. Tungod niini nga mga katarongan si Jehova andam sa pagtubag sa mga pangutana ni Abraham bahin sa Iyang katuyoan sa paglaglag sa Sodoma.​—6/15, panid 16.

▫ Ang Repormasyong Protestante sa ika-16 nga siglo nagtimaan ba sa kapasig-ulian sa matuod nga Kristiyanidad? Wala, kadto wala! Inay kay magpahinabo ug pagbalik sa tinuod nga Kristiyanidad, ang Repormasyon nagpatungha ug daghang nasyonal o rehiyonal nga mga iglesya nga nagpalana sa politikal nga estado ug aktibong nagapaluyo kanila sa ilang mga gubat.​—7/1, panid 10-11.

▫ Unsang “mga bahandi sa langit” ang gihisgotan ni Jesus diha sa Mateo 6:20? Kini mao ang bahandi nga dili gayod mahanaw, lakip ang usa ka maayong ngalan uban kang Jehova ug usa ka rekord sa matinumanon Kristohanong pag-alagad. Kini maoy lakip sa mga butang nga dili gayod kalimtan ni Jehova. (Hebreohanon 6:10)​—7/1, panid 32.

▫ Unsang mga hiyas ang gihisgotan ni Pedro ingong hinungdanong mga elemento sa atong pagtuo? (2 Pedro 1:5-7) Si Pedro miingon nga ang kaligdong, kahibalo, pagpugong-sa-kaugalingon, pagkamainantoson, diyosnong debosyon, inigsoong pagbati, ug gugma angayng idugang ngadto sa atong pagtuo.​—7/15, panid 13.

▫ Unsang pasidaan alang sa mga alagad sa Diyos ang makita diha sa asoy sa sala ni David uban kang Bath-sheba? (2 Samuel 11:2-4) Bisan pag libre sa pagtagamtam ug kalipay sulod sa iyang kaugalingong kaminyoon, gipatubo ni David ang supak-balaod nga seksuwal nga kaibog. Sa pagkakita sa talagsaong kaanyag sa asawa ni Uria, wala siya makapugong sa iyang panghunahuna​—ug sa mga buhat​—nga nangitag supak-balaod nga kalipay uban kaniya. Ang sama mahitabo kang bisan kinsa sa mga alagad sa Diyos kon dili niya isalikway kining matanga sa kadalo. (Santiago 1:14, 15)​—8/1, panid 14.