Siya Nakigbisog Alang sa Iyang Pagtuo

TULO ka tuig nga miagi si Caridad Bazán Listán, usa sa mga Saksi ni Jehova sa Cádiz, Espanya, kinahanglang operahan dayon. Ang mga bato sa apdo maoy nakaingon sa iyang hilanat ug pagkahilo sa iyang sapasapa sa dugo. Sa dihang gipasulod siya sa lokal nga ospital, iyang gipatin-aw ang iyang pinasikad sa Bibliya nga baroganan sa dili pagdawat ug abuno sa dugo. Ang mga doktor misugot sa pag-opera nga walay dugo. Apan, sa wala pa siya ipasulod sa lawak operahanan, gihangyo siya sa mga doktor sa pagpirma ug dokumento. Kini nagpakita nga sila andam sa pagtahod sa iyang desisyon bahin sa dugo, apan kon may mahitabong emerhensiya, buot nila ang iyang panugot sa paggamit sa tanang paagi sa pagtambal nga tingali kinahanglanon.

Gitambagan sa ansiano sa kongregasyon nga didto sa ospital ug ang anak nga lalaki ni Caridad, nga Saksi usab, si Caridad sa mga nalangkit sa pagpirma sa maong porma. Ang iyang pirma mag-awtorisar sa mga doktor sa pag-abuno sa dugo kon may mahitabong emerhensiya. Sa dihang miabot ang kawani sa ospital aron dalhon siya sa lawak operahanan, siya miingon nga dili siya mopirma sa dokumento. Siya sa ingon gibalik ngadto sa iyang lawak ug gipugos sa pag-usab sa iyang hunahuna.

Human sa daghang panagsultihay sila mihukom sa pagtawag sa huwes mediko sa pagkombinsir kaniya, apan walay nahimo. Gipatin-aw ni Caridad nga makasala siya atubangan sa Diyos kon iyang tugotan sila nga dugangan siyag dugo. Iyang gipatin-aw nga ubos sa Moisesnong Kasugoan, kon ang babaye gilugos, siya dili isipong sad-an kon siya misukol pinaagi sa pagsinggit sa pagpangayog tabang. (Deuteronomio 22:23-27) “Wala tagda sa mga doktor ang akong mga tinguha ug misulay sa paglapas sa akong konsensiya,” siya miingon, “busa kinahanglang mosukol ako nga samag ila akong gilugos.”

Daghang oras ang milabay, ug sa kataposan ang mga doktor miuyon sa pag-opera kaniya nga walay dugo. Sa lawak operahanan, mihangyo si Caridad nga mag-ampo kang Jehova. Gihimo niya kini, ug ang operasyon nagmalamposon.

Bisan pa, human niana migrabe ang kahimtang ni Caridad, ug ang mga doktor mihukom sa dili-pagtagad sa iyang tinguha ug gipugos kaniya ang pag-abuno ug dugo. Busa, ang doktor ug nars nangandam sa pag-abuno kaniya ug dugo. Bisan pa sa iyang luya nga kahimtang, misukol si Caridad taman sa iyang kusog. Nakahimo siya sa pagpaak sa tubo nga agianan sa dugo. Sa kataposan, naulaw kaayo ang doktor sa ilang gibuhat nga siya miingon. “Dili ako makapadayon niini. Surender na ako!” siya miingon.

Si Caridad nakalahutay sa krisis ug naulian nga walay laing mga komplikasyon. Ang mga doktor ug mga nars nakadayeg kaayo sa iyang pagtuo ug kaisog. Nahitabo kining tanan sa dihang 94 na ang edad ni Caridad.